Shymkentte jumyskerlerge 68,8 mln teńge jalaqy tólenbegen
ShYMKENT. KAZINFORM – Jyl basynan beri Shymkent qalasynda eńbek zańnamasynyń saqtalýyna qatysty 363 tekserý júrgizilip, 385 zań buzýshylyq anyqtaldy.
Memlekettik eńbek ınspektsııasy komıteti Shymkent qalasy boıynsha departamentiniń basshysy Jeńis Maqulbaevtyń aıtýynsha, qazirgi tańda qaladaǵy alty kásiporynnyń 66 jumyskerine 68,8 mln teńge kóleminde jalaqy bereshegi bar.
– Osyǵan baılanysty eńbek ınspektorlary tıisti jumystar júrgizip, jumys berýshilerge nusqamalar berdi. Alaıda bereshek belgilengen merzimde ótelmegendikten, ony májbúrlep óndirip alý úshin qujattar sot oryndaýshylarynyń óńirlik palatasyna joldandy, – dedi Jeńis Maqulbaev.
Departament málimetinshe, bankrottyq rásimi qoldanylǵan tórt kásiporynda 37 jumyskerge 58,1 mln teńge jalaqy tólenbegen.
Atap aıtqanda, «Feb stroı» JShS-inde eki jumyskerge 34,1 mln teńge, «Shymkent Qurylys» JShS-inde 33 jumyskerge 11,7 mln teńge, «TURAN ENERGO» JShS-inde bir jumyskerge 3,4 mln teńge jáne «Perspektıv Stroı» JShS-inde bir jumyskerge 8,9 mln teńge jalaqy bereshegi ótelmegen. Qaryzdy óteý jáne óndirip alý boıynsha memlekettik kirister organdary tıisti jumystar júrgizip jatyr.
Sonymen qatar qala aýmaǵynda jyl basynan beri 20 óndiristik jazataıym oqıǵa tirkelip, 31 jumysker zardap shekken.
– Onyń ishinde úsh adam jumys ornynda qaza taýyp, 16 adam aýyr, 12 adam jeńil jaraqattandy. Barlyq oqıǵa boıynsha arnaıy tergep-tekserý júrgizilip, onyń qorytyndysynda rásimdelgen materıaldar tıisti protsestik sheshim qabyldaý úshin quqyq qorǵaý organdaryna joldandy, – dedi departament basshysy.
Sondaı-aq kámeletke tolmaǵandardyń eńbek quqyqtaryn buzýdyń segiz faktisi tirkelip, nátıjesinde eki ákimshilik aıyppul salyndy.
Buǵan deıin Shymkentte 35 jumyskerge 45,8 mln teńge jalaqy bereshegi baryn habarlaǵan edik.
