Shymkentte joldyń qaq ortasynda asfalt taǵy da opyrylyp tústi
ShYMKENT. KAZINFORM – Shymkentte joldyń qaq ortasynda asfalt opyrylyp, sýǵa tolǵan tereń shuńqyr paıda boldy. Oqıǵaǵa qatysty vıdeolar áleýmettik jelilerde taralyp, turǵyndardyń synyna ushyrady.
Atalǵan jaǵdaı Ońtústik shaǵynaýdanyndaǵy Qamysty kóshesinde bolǵan. 1968 jyly salynǵan, dıametri 1000 mm káriz kollektorynyń isten shyǵýyna baılanysty joldyń asfalt jabyny opyrylǵan. Bul qubyr «Sý resýrstary Marketıngi» JShS-ne tıesili.
– Oqıǵadan keıin qaýipsizdik talaptaryna sáıkes joldyń qaýipti bóligi qorshaýǵa alyndy. Qazirgi tańda «Sý resýrstary Marketıngi» JShS tarapynan qalpyna keltirý jáne jóndeý jumystary júrgizilip jatyr, – dep habarlady qala ákimdigi.
Apat ornyna kommýnaldyq qyzmetterdiń aýyr tehnıkasy men birneshe jumys brıgadasy jumyldyryldy. Mamandar sýdy jáne jınalǵan laıdy soryp shyǵaryp, zaqymdanǵan qubyr bóligin ashyp, joldy qaıta qalpyna keltirýge kiristi. Jumys barysynda beton sorǵylary, ekskavator, KamAZ júk kólikteri jáne arnaıy tazartý tehnıkalary qoldanylyp jatyr.
Mamandardyń málimetinshe, qubyrdyń isten shyǵýyna onyń uzaq jyldar boıy paıdalanylyp, tehnıkalyq turǵydan tozýy sebep bolǵan.
Jóndeý jumystaryn shamamen bir apta ishinde aıaqtaý josparlanyp otyr.
Buǵan deıin Shymkentte eki kósheniń qıylysynda asfalt opyrylyp qalǵanyn jazǵan edik.
Sondaı-aq Qyzyljar shaǵynaýdany Aqtorǵaı kóshesinde jańadan asfalt tóselgen jol ýchaskesinde topyraqtyń shógýinen sý qubyry isten shyǵyp, turǵyndar sýsyz qalǵan edi.