Shymkentte jolaıryq qurylysynda 54 jastaǵy jumysshy qaza tapty
ShYMKENT. KAZINFORM – Shymkent qalasynda Báıdibek bı dańǵyly men Tólemetov kóshesiniń qıylysyndaǵy jolaıryq qurylysynda qaıǵyly oqıǵa bolyp, 54 jastaǵy jumysshy kóz jumdy. Oqıǵaǵa baılanysty qylmystyq is qozǵaldy.
Aldyn ala málimetke sáıkes, qurylys jumystary kezinde er adam ekskavator dońǵalaǵynyń astyna túsip qalǵan.
Aýyr jaraqattanǵan jumysshy jedel túrde aýrýhanaǵa jetkizilgenimen, dárigerler ony aman alyp qala almady.
Shymkent qalasy polıtsııa departamentiniń málimetinshe, adam ólimine ákep soqqan eńbek qaýipsizdigi talaptaryn buzý faktisi boıynsha qylmystyq is qozǵaldy.
– Qazirgi ýaqytta oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan qajetti tergeý áreketteri júrgizilip jatyr. Tergeý nátıjesi boıynsha qoldanystaǵy zańnamaǵa sáıkes protsessýaldyq sheshim qabyldanady, – delingen habarlamada.
Sonymen qatar oqıǵanyń mán-jaıyn Shymkent qalasynyń memlekettik eńbek ınspektsııasy basqarmasy da tekseredi.
Aldyn ala derek boıynsha, qosalqy merdiger uıym qaza tapqan azamatty eńbek shartyn rásimdemeı jumysqa tartqan bolýy múmkin. Inspektorlar qurylys nysanynda eńbek qaýipsizdigi talaptarynyń saqtalýyna qatysty tekserý júrgizedi.
Buǵan deıin Altynalmas ónerkásip ornyndaǵy jumysshy qazasy boıynsha is qozǵalǵany týraly habarlaǵan edik.
