Shymkentte jol jumystaryna bólingen qarjynyń 99 mln teńgesin jymqyrǵan esepshiler sottaldy
ASTANA. KAZINFORM – Shymkent qalasynyń qylmystyq ister jónindegi aýdanaralyq soty Turan aýdany ákimi apparatynyń «Turan» KMM bas býhgalteri M. Asanovaǵa jáne Tólebı aýdanynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń «Jaryq-Jol» KMM bas býhgalteri K. Besbaevaǵa qatysty úkim shyǵardy.
Olar avtomobıl joldarynyń jumysyna bólingen bıýdjet qarajatyn jymqyrǵany jáne talan-tarajǵa salǵany úshin kináli dep tanyldy.
«Asanova men Besbaeva jalǵan býhgalterlik qujattar negizinde úlestes kásiporyndarǵa qarajatty zańsyz aýdardy, sondaı-aq 2023 jyldyń aqpan-jeltoqsan aılary aralyǵynda jumys istemegen tulǵalarǵa jalaqyny júıeli túrde aýdaryp otyrdy. Nátıjesinde jymqyrǵan qarajattyń jalpy somasy 99 mıllıon teńgeden asty», - dedi Sybaılas jemqorlyqqa qarsy is-qımyl agenttiginiń resmı ókili Danııar Bıǵaıdarov jýrnalısterge arnalǵan brıfıngte.
Sot úkimimen Asanova men Besbaevaǵa sáıkesinshe 8 jáne 7 jyl merzimge bas bostandyǵynan aıyrý túrindegi jaza taǵaıyndaldy. Olar endi ómir boıy memlekettik qyzmette laýazymdy qyzmet atqara almaıdy.
Úkim zańdy kúshine engen joq.
