Shymkentte jol ortasyndaǵy tóbeles: úsh qylmystyq is qozǵaldy

ASTANA. KAZINFORM — QR Іshki ister mınıstriniń orynbasary Sanjar Ádilov Shymkentte jol ortasynda tóbelesip, kisi óltirý deregi boıynsha kúdiktilerdi ustaý isine qatysty túsinik berdi.

— Bul derek boıynsha úsh qylmystyq is qozǵaldy, ıaǵnı qastandyq jasaý jáne kisi óltirý, adam urlaý, sondaı-aq qarý-jaraq qoldaný arqyly buzaqylyq áreketi. Búginde birqatar kúdikti qamaýǵa alyndy.

Sonymen qatar, Shymkent qalasyna ortalyq apparattan basshylar — Krımınaldyq polıtsııadan, Tergeý departamentinen, Ózindik qaýipsizdik departamentinen jiberildi. Olar qyzmettik tekseri júrgizip, polıtsııa kúshteriniń jumysyn baǵalaıdy, - dedi S. Ádilov Senatta tilshiler suraǵyna jaýap bere otyryp.

Onyń aıtýynsha, búginde osy qylmystyq is boıynsha ustalmaǵan kúdiktiler de bar. Qazir polıtsııa barlyq qatysy bar adamdardy anyqtaý jáne ustaý boıynsha tıisti sharalardy qabyldap jatyr.

Budan buryn habarlanǵandaı, 20 qańtarda Erimbetov pen Rysqulov kósheleriniń qıylysynda kólik júrgizýshileri men jolaýshylary arasynda janjal shyqqan. Oqıǵa saldarynan 40 jastaǵy er adam pyshaq jaraqatynan kóz jumdy, taǵy bir azamat aýrýhanaǵa jetkizildi.