Shymkentte jol erejesin óreskel buzǵan avtokortej toqtatyldy
ShYMKENT. KAZINFORM – Shymkentte polıtseıler jol qozǵalysy erejelerin óreskel buzǵan avtokortej júrgizýshilerin anyqtap, olardyń áreketine tosqaýyl qoıdy.
Polıtsııa málimetinshe, júrgizýshiler qarsy baǵytqa shyǵý, baǵdarshamnyń tyıym salatyn sıgnalyna ótý, keri baǵytta qozǵalý jáne ózge de qaýipti manevrler jasaý arqyly jol qozǵalysynyń basqa qatysýshylaryna qaýip tóndirgen.
Beınebaqylaý júıeleri men polıtsııa qyzmetkerleriniń jedel áreketiniń nátıjesinde barlyq kólik quraldary anyqtalyp, quqyq buzýshylyqtar toqtatyldy.
- Barlyq júrgizýshi ákimshilik jaýapkershilikke tartyldy. 12 avtokólik aıypturaqqa qoıyldy. Eki quqyq buzýshyǵa qatysty ákimshilik qamaý sharasy qoldanyldy, - delingen aqparatta.
Polıtsııa jolda qaýipti áreketterge jol berilmeıtinin eskertti. Vedomstvo qandaı da bir sebepke nemese mártebege qaramastan, jol qozǵalysy erejelerin óreskel buzý derekteri qatań túrde toqtatylyp, zań aıasynda tıisti sharalar qabyldanatynyn atap ótti.
Aıta keteıik, búgin Taraz – Shymkent baǵytynda ýaqytsha kólik qozǵalysyna shekteý engizildi.
