Shymkentte jol erejesin buzǵan depýatat ákimshilik jaýapkershilikke tartyldy
ShYMKENT. KAZINFORM – Áleýmettik jelide «777» degen nómir taqqan «Lexus LX 570» kóliginiń júrgizýshisiniń jol qozǵalysy erejesin buzǵany tarady.
Beınejazbada kóliktiń qarsy qozǵalys jolaǵynda turǵany, al júrgizýshi men jolaýshynyń qaýipsizdik beldigin taqpaǵany anyq kórinedi. Kýágerlerdiń aıtýynsha, rólde Túrkistan oblysy Báıdibek aýdandyq máslıhatynyń depýtaty Erǵalı Amanbaev bolǵan.
Shymkent qalalyq polıtsııa departamenti quqyqbuzýshylyq faktisin rastady.
– Polıtsııa jol qozǵalysy erejelerin óreskel buzǵan júrgizýshini anyqtady. Tekserý barysynda onyń jalǵan tirkeý nómirlerimen kólik júrgizgeni, qarsy qozǵalys jolaǵymen júrgeni, mindetti saqtandyrý qujatynyń bolmaǵany, qaýipsizdik beldigin taqpaǵany, tyıym salynǵan jerlerde keri baǵytta qozǵalǵany belgili boldy. Osylaısha ol QR ÁQBtK-niń birneshe baby boıynsha ákimshilik jaýapkershilikke tartyldy, - dep málimdedi Shymkent qalalyq polıtsııa departamenti.
Quqyqbuzýshynyń kóligi aıyp turaǵyna qoıyldy.
– Júrgizýshimen profılaktıkalyq áńgime júrgizildi. El azamattaryn erejelerdi qatań saqtaýǵa shaqyramyz, sebebi bul joldaǵy qaýipsizdikke tikeleı áser etedi, - dep qosty polıtsııa ókilderi.
Sondaı-aq Túrkistan oblysynda Báıdibek aýdandyq máslıhatynyń depýtaty Erǵalı Amanbaev tártiptik jaýapkershilikke tartyldy. Oǵan jol qozǵalysy erejelerin birneshe ret buzǵany úshin sógis berildi.
– Búginde áleýmettik jelilerde Báıdibek aýdandyq máslıhatynyń depýtaty, AMANAT partııasynyń múshesi Erǵalı Amanbaev jol qozǵalysy erejelerin óreskel buzǵany týraly aqparat taralyp jatyr. Jasaǵan quqyq buzýshylyqtardyń sıpatyn eskere otyryp, AMANAT partııasy Báıdibek aýdandyq fılıaly Saıası keńesi Bıýrosynyń sheshimimen, aýdandyq partııalyq baqylaý komıssııasynyń usynysy boıynsha Erǵalı Amanbaev «sógis» túrinde partııalyq jaýapkershilikke tartyldy. Jalpy, AMANAT partııasy depýtattardyń partııa Jarǵysyn, sondaı-aq partııa múshesiniń Ádep kodeksin saqtaýyn muqııat qadaǵalaıtynyn atap ótken jón, - dedi AMANAT partııasy Túrkistan oblystyq fılıalynyń baspasóz qyzmeti.
Aıta keteıik, budan buryn Shymkent ákimdigi sáýlet basqarmasynyń basshysy ustalǵanyn rastaǵanyn jazǵan bolatynbyz.