Shymkentte jol apatynan keıin kólik órtendi: eki adamnyń jaǵdaıy aýyr
ShYMKENT. KAZINFORM — Shymkentte jol-kólik oqıǵasy saldarynan eki adam aýyr jaraqattanyp, jansaqtaý bólimine jetkizildi. Apattan keıin avtokólik órtenip ketken.
Qalalyq tótenshe jaǵdaılar departamentiniń málimetinshe, oqıǵa ornyna jedel jetken qutqarýshylar kóliktiń tolyqtaı otqa oranǵanyn anyqtap, órtti sóndirgen.
— Jol-kólik oqıǵasy saldarynan zardap shekken eki adam jedel medıtsınalyq kómek qyzmetiniń mamandaryna tapsyryldy, — dep málim etti vedomstvo.
Qalalyq polıtsııa departamenti atalǵan derek boıynsha qylmystyq is qozǵalǵanyn habarlady.
Aldyn ala aqparatqa sáıkes, júrgizýshi kólik tizginine ıe bola almaı, dúken ǵımaratyna soǵylǵan. Soqqydan keıin avtokólik órtengen.
— Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan keshendi tergeý is-sharalary júrgizilip jatyr, — delingen habarlamada.
Jol apatynan zardap shekken eki turǵyn № 1 qalalyq klınıkalyq aýrýhananyń jansaqtaý bóliminde jatyr.
— Eki naýqastyń da jaǵdaıy aýyr, — dep habarlady qalalyq densaýlyq saqtaý basqarmasy.
Budan buryn Ál-Farabıdegi jol apaty boıynsha sot keıinge shegerilgenin jazdyq.
