Shymkentte joǵalǵan úsh adamnyń biriniń denesi tabyldy

ShYMKENT. KAZINFORM – Araılym men Tannur aman-esen ata-anasyna tapsyryldy. Al, 20 jastaǵy jigittiń denesi tabyldy.

Shymkent qalasy polıtsııa departamentiniń baspasóz qyzmeti joǵalǵan azamattyń ólimi boıynsha polıtsııa qylmystyq is qozǵaǵandyǵyn málimdedi.

- Aldyn ala málimet boıynsha, zorlyq-zombylyq belgileri anyqtalmady. Oqıǵanyń barlyq mán-jaıyn anyqtaýǵa baǵyttalǵan tergeý is-sharalarynyń kesheni júrgizilip jatyr,  - delingen vedomstvo aqparatynda.

Aıta keteıik, budan buryn Shymkentte taksıge mingen eki adam tabylmaı jatqanyn jazǵan bolatynbyz. 20 jastaǵy jigit Ordabasy aýdanynan kólik júrgizý kýáligin almaq bolyp, Shymkentke kelgen. Degenmen, qaıta úıine qaıtpaǵan. Telefony da sónip qalǵan.

Al, izdeý jarııalanǵan kámelet jasyna tolmaǵan Araılym men Tannur esimdi jasóspirimder aman-esen tabylyp, otbasyna oraldy.