Shymkentte jyljymaıtyn múlik jármeńkesi bastaldy
ShYMKENT. KAZINFORM - Shymkent qalasyndaǵy «Kórme» ortalyǵynda Otbasy bank – «Báıterek» holdınginiń enshiles uıymy eki kúndik aýqymdy jyljymaıtyn múlik jármeńkesin bastady.
Bul tirshiligi qaınaǵan úshinshi megapolıste júzdegen otbasynyń baspanaǵa jaqyndaýyna jańa múmkindik syılaıtyn erekshe alań bolmaq. Jármeńkege elimizge tanymal jáne jergilikti jetekshi qurylys kompanııalary keldi. Olardyń qatarynda bolǵan OKS group, Kanfar building, Otaý Group, BI Group, BATSU group, Pioneer Group, Dis Construction, BKN Group, Royal Style City, Prime Builder jáne Altyn Construction syndy kompanııa ókilderi ózderiniń eń tańdaýly jobalaryn usyndy. Atalǵan árbir kompanııanyń artynda jańa shaǵynaýdan, zamanaýı ınfraqurylym, bolashaqqa salynǵan berik ınvestıtsııa jatyr.
Qala turǵyndary úshin úı tańdaýǵa keń múmkindik ashqan osynaý jármeńkege jınalǵandar qatary kóp boldy. Munda kelýshiler bir mezette birneshe turǵyn úıdiń ornalasý aýmaǵyn, jobasyn, baǵa aıyrmashylyǵyn kórip, qurylysshylarmen betpe-bet júzdesip, bank keńesshileri arqyly nesıe sharttarymen tanysyp, tolyq maǵlumat alýǵa múmkindik aldy.
Bank keńesshileri arqyly aldyn ala maquldaý jumystaryn da jasap kórip jatty. Bir sózben aıtqanda, baspana izdegen jan bir kúnde birneshe jyldyq aqparatqa qanyqty. Jármeńke aıasynda «Naýryz 2025», «Naýryz jumysker» sııaqty áleýmettik mańyzy zor baǵdarlamalardyń múmkindikteri de keńinen túsindirildi.
– Bıylǵy jármeńkeniń aýqymy burynǵydan da keńeıip otyr. Shymkent qana emes, Túrkistan qalasynda úı salǵan iri qurylys kompanııalary da qatysyp jatyr. Ár kompanııa óz turǵyn úı jobasyn tanystyryp qana qoımaı, kelýshilerge túrli jeńildikter usynyp jatyr. Biri paıyzdyq mólsherleme boıynsha shegerim jasasa, endi biri aqshalaı utystar men baǵaly syılyqtar oınatyp, jármeńkege erekshe kóńil kúı qosyp otyr. Bul is-sharany dál qazir ótkizýdiń ózindik sebebi bar. Qazir «Naýryz» baǵdarlamasyna ótinish qabyldaý qarqyndy júrip jatyr. Atalǵan baǵdarlamaǵa Shymkent qalasynan 1 000 azamat qatysady dep josparlanyp otyr. Qazirdiń ózinde qatysýshylardyń shamamen 25 paıyzy tólem qabilettiligin tekserip kórip, baǵdarlamanyń tıimdiligine kóz jetkizdi. Kópshiligi sharttardyń qolaıly ekenin aıtyp, oń pikir bildirip jatyr. 15 jeltoqsannan ótinish bergen azamattarmen júıeli ári tyǵyz jumysty bastaımyz. Bizdiń maqsat árbir turǵynǵa tolyq aqparat berip, baspanaǵa bir qadam jaqyndatý, – dedi Otbasy bank» AQ Shymkent qalalyq fılıalynyń dırektory Dáýren Saýdabaev.
Jármeńkege kelgenderdiń biri, 31 jastaǵy tórt balanyń anasy, Otbasy bank salymshysy Gúlnur Poshanova birneshe jyldyq eńbeginiń nátıjesimen bólisti.
– Otbasy bankke salymshy bolǵanyma birneshe jyl boldy. Joldasym ýran óndirisinde vahtalyq ádispen jumys isteıdi, ózim dárigermin, qazir bala kútimimen úıdemin. Turaqty tabys bolmaǵanymen, 2021 jyldan beri bar múmkindikti paıdalanyp, 8 mıllıon teńge jınadyq. Bul eńbektiń, únemniń, bolashaqqa degen senimniń jemisi. Buıyrsa, keler jyly úsh bólmeli úı alýdy josparlap otyrmyz. Balalar keń, jaryq úıde ósse eken deımiz. Otbasy bank biz úshin jaı ǵana qarjy uıymy emes, jas otbasyǵa úmit syılaǵan senimdi serikteske aınaldy, – deıdi ol.
Aıta keteıik, bıyldyń ózinde Shymkent qalasy boıynsha Otbasy bankke 60 myńnan astam jańa salymshy qosylyp, 4 530 otbasy qonys toıyn toılaǵan. Munyń barlyǵy banktiń qoljetimdiligi jáne nesıe mólsherlemeleriniń turaqty bolýynyń arqasynda qol jetken jetistik. Bastapqy jarnasy jınaqtalǵan salymshylar úshin nesıeler jyldyq 3,5%-dan 8,5%-ǵa deıin rásimdeledi. Bul – elimizdegi eń tómen paıyzdardyń biri.
Shymkent qalasy ákimdigimen birlesip júzege asyrylyp jatqan «Qamqor» baǵdarlamasy arqyly bıyl 403 azamat jańa baspanaǵa qol jetkizdi. Jyldyq mólsherleme nebári 5 paıyzdy quraǵan bul baǵdarlamaǵa dárigerlerden bastap muǵalimderge, mádenıet, sport, energetıka salasynyń mamandaryna deıin kóptegen azamat qatysty. Qazirgi tańda baspana alýǵa ótinimder men qujat qabyldaý rásimi tolyq tsıfrlandyrylyp, «Baspana market» portaly arqyly júrgiziledi. Bul da halyqqa kórsetiletin qyzmettiń jańa deńgeıi.
Shymkenttegi jyljymaıtyn múlik jármeńkesi jańa úı izdegenderge ǵana emes, jalpy turǵyn úı naryǵyndaǵy ashyqtyqqa, halyqtyń qarjylyq saýattylyǵyn arttyrýǵa jáne baspanaly bolýdy jeńildetýge baǵyttalǵan ıgi bastama boldy. Úshinshi megpolıs jurty úshin bul jármeńke jaqyn bolashaqta taǵy da kóptegen otbasynyń qonys toıymen jalǵasady degen senim bar.
Nazgúl NAZARBEK,
Shymkent qalasy