Shymkentte jylý jelilerinen 135 aqaý anyqtaldy
ShYMKENT. KAZINFORM — Shymkentte jylý jelilerin tekserý kezinde birqatar aqaý anyqtaldy. Qazir olardy joıý jumystary jalǵasyp jatyr.
Shymkent qalasynyń energetıka jáne ınfraqurylymdy damytý basqarmasynyń málimetinshe, aldaǵy jylý maýsymyna daıyndyq bekitilgen kestege sáıkes júrgizilip jatyr. Qazirgi jóndeý jumystary qalanyń 18,6 shaqyrym jylý jelisin qamtıdy.
— Qaladaǵy jylý jelilerin gıdravlıkalyq synaqtan ótkizý kezinde 135 aqaý anyqtaldy. Onyń 95-i tolyq joıyldy. Qalǵan 40 aqaýdy joıý jumystary josparǵa sáıkes jalǵasyp jatyr, — dep habarlady vedomstvodan.
Aldaǵy jylý maýsymyna 71 avtonomdy jáne mektep qazandyǵynyń 69-y, ıaǵnı 97 paıyzy daıyn. Sondaı-aq vedomstvoǵa qarasty 17 sorǵy stantsııasynyń 13-i jóndeldi. Olardyń daıyndyǵy 76 paıyzǵa jetti. Budan bólek «Shymsıtı», «Aqjaıyq» jáne «Turan-1» qazandyqtarynda jańa jylý almastyrǵysh qondyrǵylar ornatylyp jatyr.
— Qaladaǵy 2241 kópqabatty úıdiń 1796-sy nemese 80 paıyzy jylý maýsymyna daıyn. Bıýdjettik mekemeler arasynda 211 nysannyń 194-i, ıaǵnı 92 paıyzy ázir. 950 kópqabatty úı boıynsha servıstik uıymdarmen kelisimshart jasaldy. Taǵy 1291 úı boıynsha kelisimshart jasaý jumystary júrgizilip jatyr, — dep málimdedi basqarma.
Vedomstvo ókilderi úı ishindegi jylý júıelerin sapaly daıyndaý úshin páter ıeleri, PIK jáne múlik ıeleri birlestikteri (MIB) servıstik uıymdarmen kelisimsharttardy ýaqytyly jasaýy qajet ekenin atap ótti.
Basqarma sondaı-aq jylýmen jabdyqtaýshy «Qýatjylýortalyq-3» MKK men qazaqstandyq elektrotehnıkalyq kompanııa Alageum Electric rezervtik otyn saqtaýǵa arnalǵan syıymdylyqtardy jóndeý jónindegi memorandýmǵa qol qoıýdy josparlap otyrǵanyn habarlady.
Buǵan deıin Qazaqstannyń jylý maýsymyna daıyndyǵy týraly jazǵan edik.
Sondaı-aq Úkimet otyrysynda jylý berý maýsymyna daıyndyq jumystaryn baıaý júrgizip jatqan óńirler ataldy.
