Shymkentte jylý tarıfteri qaıta qaraldy: kim qansha tóleıdi
ShYMKENT. KAZINFORM – Shymkentte jylytý maýsymy qarsańynda jylýmen jabdyqtaý tarıfteri qaıta qaraldy. Ózgerister zańdy tulǵalar men kásiporyndarǵa qatysty boldy. Al turǵyndar úshin jylý tarıfteri burynǵy deńgeıde qaldy.
Jańartylǵan tarıfter 1 qazannan bastap kúshine endi. Tıisti buıryqqa Tabıǵı monopolııalardy retteý komıteti Shymkent qalasy boıynsha departamentiniń basshysy Kenjebolat Kóshekbaev 30 qyrkúıekte qol qoıǵan. Qujatta «Qýatjylýortalyq-3» mekemesiniń jylý energııasyn óndirý, berý, taratý jáne jabdyqtaý qyzmetterine arnalǵan jańartylǵan tarıfter belgilengen.
Zańdy tulǵalar men kásiporyndar úshin jylý energııasynyń ortasha bosatý tarıfi qosylǵan qun salyǵyn (QQS) qosa eseptegende, bir gıgakalorııaǵa 23 405,70 teńge bolyp belgilendi. Jylý eseptegishi ornatylǵan nysandar úshin tarıf 20 427,74 teńge bolsa, eseptegishi joq nysandar úshin 43 910,48 teńgeni quraıdy.
Shymkenttegi bıýdjettik uıymdar úshin jylý energııasynyń ortasha bosatý tarıfi QQS-ty qosa eseptegende, bir gıgakalorııaǵa 128 660,07 teńge bolyp bekitildi. Eseptegishi bar uıymdar úshin tarıf 125 753,73 teńge, al eseptegishi joq uıymdar úshin 165 076,62 teńge boldy.
Tabıǵı monopolııalardy retteý komıtetiniń Shymkent qalasy boıynsha departamenti turǵyndar úshin tarıfter burynǵy deńgeıde qalǵanyn rastady.
Turǵyndar úshin jylý energııasynyń ortasha bosatý tarıfi QQS-ty qosa eseptegende, bir gıgakalorııaǵa 7 456,61 teńgeni quraıdy. Úıge ortaq jylý eseptegishi ornatylǵan kópqabatty úılerde tarıf bir gıgakalorııaǵa 4 956,34 teńge bolsa, eseptegishi joq úılerde 9 748,83 teńge bolyp belgilengen.
Úıge ortaq jylý eseptegishi joq úılerde tólem sharshy metr boıynsha da esepteledi. Qarashada bir sharshy metr úshin 154,04 teńge, jeltoqsanda 210,57 teńge tólenedi. Tozyǵy jetken úıler úshin bólek tarıf qarastyrylǵan. Mundaı úılerde qarasha aıyndaǵy tarıf bir sharshy metrge 117,81 teńge, jeltoqsanda 161,07 teńge bolady.
Ystyq sýdyń tarıfi de ózgergen joq. Eseptegishi bar úılerde ystyq sýdyń bir tekshe metri 380,81 teńge turady. Al eseptegishsiz, bekitilgen normatıv boıynsha eseptegende, tólem bir adamǵa aıyna 1 218,59 teńgeni quraıdy.
Tozý deńgeıi joǵary úılerdiń turǵyndary úshin de bólek tarıfter belgilengen. Eseptegishi bar jaǵdaıda ystyq sýdyń bir tekshe metri 291,27 teńge bolsa, eseptegishsiz tólem bir adamǵa aıyna 932,07 teńge bolady.
Bekitilgen tarıfter 2026 jylǵy 31 jeltoqsanǵa deıin qoldanylady.
Eske salaıyq, Shymkentte jylý men ystyq sý úshin tutynýshylardyń jalpy bereshegi 821,8 mln teńgege jetken. «Qýatjylýortalyq-3» mekemesiniń málimetinshe, onyń 416,5 mln teńgesi zańdy tulǵalarǵa, al 405,3 mln teńgesi turǵyndarǵa tıesili.
