Shymkentte jylytý maýsymynda 12 adam gazdan ýlanyp kóz jumdy
ShYMKENT. KAZINFORM — Shymkentte jylytý maýsymynda órt oqıǵalary azaıǵanǵanymen, gazdan ýlaný derekteri artqan.
Shymkent qalasy Tótenshe jaǵdaılar departamentiniń málimetinshe, qaladaǵy órttiń 80 paıyzǵa jýyǵy turǵyn úı sektoryna tıesili, kóbine jylytý maýsymynda tirkeledi.
— 2025-2026 jylǵy jylytý maýsymynda qala boıynsha 73 órt oqıǵasy tirkeldi. Ókinishke qaraı, adam shyǵyny bar, 4 adam qaıtys boldy. Sonymen qatar 2 adam jaraqattandy. Órttiń shyǵý sebepteriniń basym bóligi elektr symdarynyń qysqa tuıyqtalýynan bolǵan, — dedi departamenttiń Memlekettik órt baqylaý basqarmasy bastyǵynyń mindetin atqarýshy Raýan Ordabek.
Spıkerdiń aıtýynsha, ótken maýsymmen salystyrǵanda órt oqıǵalary azaıǵan. Alaıda gazdan ýlaný deregi kóbeıgen. Naqtyraq aıtqanda, 125 oqıǵa tirkelgen.
— Gazdan ýlanýdan zardap shekkenderdiń sany 288 adamǵa jetip, 18 paıyzǵa ósti. Ótken jylytý kezeńinde ýly gazdyń saldarynan 3 adam kóz jumsa, bıylǵy maýsymda 12 adam qaza boldy, — dedi ol.
Buǵan deıin ótken aıda Shymkent qalasynda kópqabatty turǵyn úıdiń birinen gazdan ýlanǵan tórt adamnyń máıiti tabylǵanyn jazǵan edik.
