Shymkentte jylytý maýsymy 1 qarashada bastalady

ShYMKENT. KAZINFORM – Qalada aýa temperatýrasynyń tómendeýine baılanysty jáne ákim qaýlysyna sáıkes jylytý maýsymy 1 qarashadan bastap iske qosylady.

Qalalyq ákimdiktiń málimetinshe, aldymen jylý áleýmettik nysandarǵa – mektepterge, balabaqshalarǵa, aýrýhanalar men basqa da mekemelerge beriledi. Budan keıin kezeń-kezeńimen kópqabatty turǵyn úıler men ózge de ǵımarattar qosylady.

Qalany tolyq jylýmen qamtý jumystaryn 6 qarashaǵa deıin aıaqtaý josparlanyp otyr.

Buǵan deıin Úkimet elimizdiń jylytý maýsymyna tolyq daıyn ekenin málimdegen bolatyn. Qazaqstanda kómir men mazýt tapshylyǵy joq, sondaı-aq turaqty jetkizilim qamtamasyz etilgen.

Sonymen qatar, el aýmaǵynda kómir men temirjol tarıfteriniń baǵasy turaqty saqtalyp, janar-jaǵarmaı naryǵynda AI-92 markaly benzın men dızel otynyna baǵanyń ósýine moratorıı engiziledi.