Shymkentte qyzanaq ósiretin elimizdegi eń iri jylyjaı ashyldy

ShYMKENT. KAZINFORM – Aýyl sharýashylyǵy mınıstri Aıdarbek Saparov Shymkent qalasynda jylyna 155 myń tonna qyzanaq ósirýge eseptelgen, elimizdegi eń iri jylyjaı keshenderiniń biriniń saltanatty ashylý rásimine qatysty.

Mınıstrliktiń málimetinshe, is-sharaǵa sondaı-aq Túrkııa Respýblıkasynyń Túrkistandaǵy Bas konsýly Levent Gıýrjan, túrik «Alarko Holding» holdınginiń basqarma tóraǵasy Izzet Garıh, sondaı-aq Shymkent qalasy ákimdigi ókilderi qatysty.

Aıdarbek Saparovtyń aıtýynsha, Túrkııa – Qazaqstannyń AÓK salasyndaǵy negizgi seriktesteriniń biri. Búgingi tańda elimizde túrik ınvestorlarymen birlesip jalpy quny 1,1 mlrd AQSh dollaryn bolatyn 14 joba júzege asyrylyp jatyr.

– Memleket basshysynyń tapsyrmasymen AÓK salasyna ınvestıtsııa tartýǵa barlyq jaǵdaı jasaldy. Memleket pen bıznestiń tıimdi ózara is-qımylynyń, ınvestorlardyń Qazaqstan ekonomıkasyna joǵary seniminiń jáne onyń ornyqty damýyna degen nyq senimniń nátıjesinde osy joba júzege asyryldy.
Mundaı yntymaqtastyq tájirıbe almasýǵa, tehnologııalardy tartýǵa jáne agrarlyq saladaǵy taýar aınalymyn ulǵaıtýǵa zor múmkindik beredi. Birlesken kúsh-jiger azyq-túlik qaýipsizdigin arttyryp, eki eldiń aýyl sharýashylyǵy ónimderiniń básekege qabilettiligin kúsheıtetinine senimdimiz. Jobanyń barlyq kezeńinde qajetti qoldaý kórsetýge daıynbyz, - dedi mınıstr.

Búgin keshendi iske qosý aıasynda qurylys jumystarynyń birinshi kezeńine kiretin aýmaqta alǵashqy qyzanaq ónimi jınaldy.

Aıta keteıik, jalpy quny 650 mln AQSh dollaryn quraıtyn iri ınvestıtsııalyq jobanyń qurylysy byltyr jazda bastalǵan.
Keshenniń jyldyq óndiristik qýaty 155 myń tonna, aýmaǵy 650 gektar, birinshi kezeń onyń 208 gektaryn qamtıdy.

Jyl sońyna deıin keshenniń 40 gektar ýchaskesi paıdalanýǵa berilmek. Bul óndiris kólemin ulǵaıtyp, ishki naryqty jańa pisken kókónispen qamtamasyz etýge jol ashady.
Bastapqy kezeń tolyq iske qosylǵannan keıin 2 myń jumys orny, al joba tolyq aıaqtalǵanda 5 myń jumys orny ashylmaq.

Taǵy bir mańyzdy bóligi – halyqaralyq standarttarǵa saı zamanaýı zerthanasy bar arnaıy agroakademııalyq ortalyqtyń qurylýy. Bul ortalyq agrarlyq sala úshin bilikti kadrlar daıarlaýdy qamtamasyz etedi.

Búginde elimizdegi jylyjaılar 1,3 myń gektardy quraıdy, olar jylyna 200 myń tonna kókónis óndiredi.
«ALSERA KZ» jylyjaı kesheniniń iske qosylýy elimizdegi jylyjaı ónimderiniń jalpy óndirisin edáýir arttyryp, azyq-túlik qaýipsizdigin kúsheıtýge jáne maýsymaralyq kezeńde ımportqa táýeldilikti tómendetýge yqpal etedi.

Buǵan deıin deıin Shymkentte elimizdegi eń úlken jylyjaı salynatynyn jazǵan bolatynbyz.