Shymkentte jylan kóbeıdi: turǵyndardan 150-ge jýyq shaqyrtý tústi
ShYMKENT. KAZINFORM – Shymkentte kúnniń ysýyna baılanysty jylandar turǵyn úıler men aýlalarda jıi kezdese bastaǵan.
Qalalyq tótenshe jaǵdaılar departamentiniń málimetine súıensek, jyl basynan beri qalada jylan shyǵýyna baılanysty 144 shaqyrtý tirkelgen. Shaqyrtýlardyń basym bóligi jeke turǵyn úılerden túsken.
Osy kezeńde 91 jylan ustalyp, qaýipsiz jerge jiberildi. Al 53 jaǵdaıda jylan tabylmaǵan. Qazirgi ýaqytta jylan shaǵý faktileri joq. Al ýly jándikterge, onyń ishinde shaıandarǵa qatysty shaqyrtýlar tirkelmegen.
Departamenttiń bólim basshysy Erbol Ospanovtyń aıtýynsha, turǵyndar jylannyń ýly nemese ýly emes túrin ajyrata bermeıdi, sondyqtan kez kelgen jaǵdaıda saqtyq tanytqan jón.
– Jylandar kóbine jer úılerdiń aýlalarynda, jertólelerde, tabaldyryq mańynda jáne turǵyn úıdiń ishinde kezdesedi. Qalyń shópterdiń arasynda da jıi júredi. Kóbine poloz degen jylannyń túri kóp. Maı jylan da kezdesedi. Biraq oǵan sırek shyǵamyz. Jylandar kóbine tyshqandary bar nemese qustar uıalaıtyn jerlerge jaqyn júredi. Sebebi olar solarmen qorektenedi, – dedi spıker.
Mamandar turǵyndarǵa jylan nemese basqa da qaýipti jándikterdi baıqaǵan jaǵdaıda óz betinshe áreket etpeýge keńes beredi. Mundaı kezde qutqarýshylarǵa habarlasyp, qashyqtan baqylaǵan durys.
Aıta keteıik, jylandy aýlaý sáýir aıynan bastalyp, qazan aıyna deıin jalǵasady. Ótken jyly osy kezeńde qalada 200-ge jýyq shaqyrtý túsip, 116 jylan ustalǵan.
Buǵan deıin BQO-da turǵyn úıdiń edeni astynan jylandar shyqqany týraly jazǵan edik.
