Shymkentte jyl sońyna deıin birjolǵy merekelik tólemdi kimder alady
ShYMKENT. KAZINFORM — 2026 jyldyń sońyna deıin Shymkentte turǵyndardyń jekelegen sanattaryna merekelik jáne ataýly kúnderge oraı birjolǵy áleýmettik tólemder qarastyrylǵan.
Qarjylaı kómek zeınetkerlerge, múgedektigi bar balalarǵa, ata-anasynyń qamqorlyǵynsyz qalǵan kámeletke tolmaǵandarǵa jáne Jeltoqsan oqıǵasyna qatysqany úshin saıası qýǵyn-súrgin qurbandary retinde aqtalǵan azamattarǵa beriledi. Áleýmettik kómek máslıhattyń kelisimimen jergilikti bıýdjetten qarjylandyrylady.
1 qazan — Qarttar kúnine oraı 70 jastan asqan 35 973 zeınetkerge birjolǵy kómek kórsetiledi. Árqaısysyna 3 AEK, ıaǵnı 12 975 teńgeden tólenedi. Bul tólemderge qala bıýdjetinen 466,8 mln teńge bólingen.
— Merekelik tólemderden bólek, qalada 80 jastan asqan jalǵyz turatyn azamattarǵa aı saıyn qoldaý kórsetiledi. Qazir mundaı kómekti 101 zeınetker alady. Árqaısysyna 2 AEK, ıaǵnı 8 650 teńgeden tólenedi. Olardy qoldaýǵa 7 mln teńge qarastyrylǵan, — dep habarlady qala ákimdigi.
25 qazan — Respýblıka kúnine oraı múgedektigi bar balalarǵa jáne ata-anasynyń qamqorlyǵynsyz qalǵan balalarǵa birjolǵy kómek berý josparlanyp otyr. Bastapqyda bul tólemder Konstıtýtsııa kúnine oraı qarastyrylǵan edi. Alaıda bıyl merekeniń 30 tamyzdan 15 naýryzǵa aýystyrylýyna baılanysty tólemder Respýblıka kúnine josparlanǵan.
— Qazir tıisti normatıvtik-quqyqtyq aktilerge qajetti ózgerister engizilip jatyr. Sondyqtan tólemder Respýblıka kúnine oraı beriledi. 18 jasqa deıingi múgedektigi bar balalardyń árqaısysyna 5 AEK, ıaǵnı 21 625 teńgeden tólenedi. 1 qyrkúıektegi málimet boıynsha, Shymkentte osy sanatqa jatatyn 8 238 bala tirkelgen. Jergilikti bıýdjetten 178,1 mln teńge bólý josparlanyp otyr. Sonymen qatar ata-anasynyń qamqorlyǵynsyz qalǵan 720 balaǵa 20 AEK, ıaǵnı 86 500 teńgeden beriledi. Olarǵa 62,3 mln teńge qarastyrylǵan, — dep naqtylady vedomstvo.
Bıyl Shymkentte sońǵy tólemder 16 jeltoqsan — Táýelsizdik kúnine oraı beriledi. Jeltoqsan oqıǵasyna qatysqany úshin saıası qýǵyn-súrgin qurbany retinde aqtalǵan 33 azamattyń árqaısysyna 65 AEK, ıaǵnı 281 125 teńge kóleminde qarjylaı qoldaý jasalady. Bul maqsatqa qala bıýdjetinen 9,2 mln teńge baǵyttalady.
Buǵan deıin Qazaqstanda múgedektigi bar azamattarǵa qandaı memlekettik járdemaqylar men tólemder beriletinin habarlaǵan edik.
