Shymkentte jyl basynan beri 4 bala terezeden qulaǵan
ShYMKENT. KAZINFORM — Balalardyń terezeden qulaýyna baılanysty tirkelgen barlyq oqıǵa eresekterdiń salǵyrttyǵynan bolǵan.
Shymkent qalasy Tótenshe jaǵdaılar departamentiniń resmı ókili, azamattyq qorǵaý kapıtany Asqar Sháriptiń aıtýynsha, 2026 jyldyń basynan beri qala aýmaǵynda balalardyń kópqabatty turǵyn úılerdiń terezesinen qulaýyna baılanysty 4 oqıǵa tirkelgen.
— Onyń ekeýinde balalar oqıǵa ornynda kóz jumdy, taǵy eki bala jaraqattandy. Barlyq jaǵdaı ata-analardyń nemese eresekterdiń balalardy qaraýsyz qaldyrýy jáne páter terezeleriniń ashyq bolýy saldarynan bolǵan, — dedi spıker.
Departament málimetinshe, ótken jyly Shymkentte osyndaı 5 oqıǵa tirkelgen. Saldarynan 3 bala qaza taýyp, 2-i jaraqattanǵan.
Balalardyń qaýipsizdigin qamtamasyz etý maqsatynda bıyl «Qaýipsiz tereze» aktsııasy aıasynda 113 reıd uıymdastyrylyp, turǵyndarǵa 3330 jadynama taratyldy. Sonymen qatar kópqabatty turǵyn úılerdiń terezelerine 53 qorǵanysh bekitkishi (blokırator) ornatylǵan.
Asqar Sháriptiń sózinshe, balalardyń terezeden qulaý faktileriniń aldyn alý úshin dybys zoraıtqysh qurylǵymen jabdyqtalǵan drondar da paıdalanylyp jatyr.
— Bul tásil arqyly turǵyndarǵa qaýipsizdik erejeleri jóninde eskertý habarlamalary jetkiziledi. Ásirese kópqabatty úılerde turatyn ata-analardyń nazaryn balalardy qaraýsyz qaldyrmaý jáne terezelerge qorǵanys quraldaryn ornatý qajettiligine aýdarý kózdelgen, — dedi ol.
Buǵan deıin Shymkentte ishinde jolaýshysy bar lıftiniń 12-qabattan qulap ketkeni týraly habarlaǵan edik.
