Shymkentte jyl basynan beri 213 egiz jáne tórt úshem dúnıege keldi
ASTANA. KAZINFORM — Jyl basynan beri Shymkentte 20 myńnan astam sábı dúnıege kelgen. Olardyń arasynda 213 egiz ben tórt úshem bar. Qalada 200 oryndyq jańa perınataldyq ortalyqtyń qurylysy da júrip jatyr. Bul týraly DSM málim etti.
Shymkent qalasynda demografııalyq ósim turaqty jalǵasyp keledi. Jyl basynan beri megapolıste 20 myńnan astam sábı dúnıege keldi. Onyń ishinde 213 egiz jáne tórt úshem tirkeldi. Bul kórsetkish qala turǵyndarynyń tabıǵı ósimi men ana men bala densaýlyǵyn qorǵaý baǵytyndaǵy jumystardyń mańyzyn aıqyndaıdy.
Jýyrda Shymkent qalalyq perınataldyq ortalyǵynda jeti balanyń anasy 36 jastaǵy Ajar Tashqaraeva úshemdi dúnıege ákeldi. Alsııa, Safııa jáne Aımuhammed esimdi sábılerdiń jaǵdaıy jaqsy. Buǵan deıin eki ret egiz bosanǵan ana osylaısha on balanyń anasy atandy. Otbasy dárigerlerdiń kómegi men kórsetken qamqorlyǵyna alǵysyn bildirdi.
Qalalyq densaýlyq saqtaý basqarmasynyń málimetinshe, ana men bala ólimi kórsetkishi 23,6 paıyzǵa tómendegen. Bul baǵyttaǵy oń nátıjege júkti áıelderdi erte esepke alý, ýaqtyly dıagnostıkalyq tekserýden ótkizý, júktilik barysyn turaqty baqylaý jáne bosandyrý uıymdarynda medıtsınalyq kómektiń sapasyn arttyrý yqpal etedi.
Búginde qalada bosandyrý qyzmetin kórsetetin tórt medıtsınalyq uıym jumys isteıdi. Onyń úsheýi úshinshi deńgeıdegi, bireýi ekinshi deńgeıdegi perınataldyq kómek kórsetedi. Medıtsınalyq uıymdarda joǵary qaýip tobyna jatatyn júkti áıelderge, merziminen buryn dúnıege kelgen sábılerge jáne erekshe kútimdi qajet etetin nárestelerge tıisti medıtsınalyq kómek kórsetiledi.
Sonymen qatar Memleket basshysynyń tapsyrmasyna sáıkes, Shymkent qalasynda 200 oryndyq jańa perınataldyq ortalyqtyń qurylysy júrgizilip jatyr. Zamanaýı medıtsınalyq keshen halyqaralyq standarttarǵa saı salynyp, zerthanalyq-dıagnostıkalyq bólimshemen jabdyqtalady. Qurylys jumystaryn 2027 jyldyń tórtinshi toqsanynda aıaqtaý josparlanǵan. Jańa ortalyqtyń iske qosylýy bosandyrý qyzmetiniń áleýetin arttyryp, medıtsınalyq ınfraqurylymdy damytýǵa, ana men balaǵa kórsetiletin kómektiń sapasy men qoljetimdiligin jaqsartýǵa múmkindik beredi.
Ana men bala densaýlyǵyn qorǵaý — densaýlyq saqtaý salasynyń basty basymdyqtarynyń biri. Árbir sábıdiń aman-esen dúnıege kelýi men deni saý bolyp ósýi — ortaq mindet.
Aıta keteıik, buǵan deıin Almatyda bir aıda eki úshem dúnıege kelgen bolatyn.
