Shymkentte jetkizýshi marqum bolǵan dárigerdiń qoly qoıylǵan sanıtarlyq qorytyndyny usynǵan
ASTANA. KAZINFORM — Elimizdiń Joǵarǵy soty Shymkenttegi memlekettik satyp alý boıynsha ótken konkýrs nátıjesin joıdy. Oǵan sebep konkýrs jeńimpazy qujat berilgenge deıin qaıtys bolǵan dárigerdiń qoly qoıylǵan sanıtarlyq qorytyndyny usynǵan.
2024 jyly Shymkent qalasynyń Memlekettik satyp alý basqarmasy mektepte balalardy tamaqtandyrýdy uıymdastyrý boıynsha qyzmet kórsetýge konkýrstyń qorytyndysy týraly hattama jarııalaǵan. Jeńimpaz bolyp 22 upaı jınaǵan jeke kásipker E. tanylsa, al osynshama upaı jınaǵan jeke kásipker B. ekinshi orynǵa ıe bolǵan.
Jeke kásipker B. baıqaýdyń qorytyndysyna yqpal etetin jalǵan aqparat bergendikten, baıqaý jeńimpazyna az upaı berý kerek dep eseptep, sotqa shaǵymdanǵan.
MAÁS-y jáne apellıatsııa talap qoıýdy qanaǵattandyrǵan.
Joǵarǵy sottyń ákimshilik ister jónindegi sot alqasy isti qaraı otyryp, jergilikti sottyń baıqaý qorytyndylary týraly daýly hattama zańsyz jáne kúshi joıylýǵa jatady degen tujyrymdarymen kelisti.
— Osylaısha, qoǵamdyq tamaqtanýdy uıymdastyrý qaǵıdalarynyń 72-tarmaǵynyń talaptaryna sáıkes biliktilik talaptary boıynsha jalǵan aqparat berý faktisi anyqtalǵan jaǵdaıda áleýetti ónim berýshi baıqaýǵa qatysýǵa jiberilmeıdi. Bul rette, qaǵıdalardyń 7-qosymshasyna eskertpege sáıkes áleýetti ónim berýshiler sanıtarlyq-epıdemıologııalyq qorytyndy qosa bere otyryp, qoǵamdyq tamaqtaný obektisine quqyq belgileıtin qujattardyń kóshirmelerimen jumys tájirıbesin rastaıdy, — dep túsindirdi Joǵarǵy sottan.
Jeke kásipker E. eńbek ótilin rastaý úshin 2015 jylǵy 26 naýryzdaǵy sanıtarlyq-epıdemıologııalyq qorytyndysyn usynǵan. Alaıda, sotta anyqtalǵandaı, qorytyndyǵa qol qoıǵan bas sanıtarlyq dáriger 2014 jylǵy 12 qarashada qaıtys bolǵan. Sonymen qatar, ýákiletti organdardyń jaýabynan mundaı sanıtarlyq-epıdemıologııalyq qorytyndynyń berilmegeni anyqtaldy.
Joǵarǵy sot jergilikti sottardyń talap qoıýdy qanaǵattandyrý jónindegi qorytyndylary zańdylyq pen ádildik qaǵıdattaryna sáıkes keletinin aıtyp, is boıynsha shyǵarylǵan sot aktilerin kúshinde qaldyrdy.
Aıta keteıik, Joǵarǵy sottyń bıyl sáýirdegi esebi boıynsha jyl basynan beri qylmystyq ister sany artqan.