Shymkentte jer ıesi sot arqyly ákimdikten 83 mln teńge ótemaqy óndirdi
ShYMKENT. KAZINFORM – Jer ýchaskesiniń ıesi sot arqyly alynǵan jeri úshin tólenetin ótemaqyny eki esege jýyq arttyrýǵa qol jetkizdi. Ákimdik usynǵan 46 mln teńgeniń ornyna sot Jer qatynastary basqarmasyna 83 mln teńgeden astam ótemaqy tóleýdi mindettedi.
Talap qoıýshynyń menshiginde 0,19 gektar jer ýchaskesi bolǵan. Shymkent ákimdigi ony memlekettik qajettilik úshin alyp qoıý týraly qaýly qabyldap, 46 mln teńge kóleminde ótemaqy usynǵan.
Alaıda menshik ıesi bul somany tómen dep sanap, tólemdi qabyldaýdan bas tartqan. Keıin ákimdik sot arqyly jerdi májbúrlep alyp qoıýdy rásimdeýge tyrysqan, biraq is óndirisi qaraýsyz qaldyrylǵan. Osydan keıin bılik organdary jerdi alyp qoıý rásimin tolyq aıaqtamaǵan.
Soǵan qaramastan, jer is júzinde paıdalanýǵa alynǵan. Ýchaske aýmaǵynan jalpy paıdalanymdaǵy avtomobıl joly salynǵan. Biraq jer ıesine ótemaqy tólenbegen.
Sot qurylys-tehnıkalyq saraptama taǵaıyndady. Sarapshylar jer ýchaskesiniń naryqtyq qunyn 83 mln teńgeden astam dep baǵalady.
– Sottyń sheshimimen talap qoıý qanaǵattandyryldy. Shymkent qalasynyń Jer qatynastary basqarmasy talap qoıýshyǵa tıesili memleket muqtajy úshin alynǵan jer ýchaskesine 83 419 500 teńge kóleminde ótemaqy tóleýge mindetteldi, – dep habarlady qalalyq azamattyq ister jónindegi aýdanaralyq sot.
Sot sondaı-aq jeke uıǵarym shyǵaryp, ony Shymkent ákimine joldady. Qujatta jerdi alyp qoıý kezinde zańbuzýshylyqtar bolǵany kórsetilgen.
– Memleket muqtajy úshin ıelikten shyǵarýǵa jatatyn jer ýchaskesin alý jáne ótemaqy tóleý quzyretti memlekettik organ tarapynan zańda belgilengen tártippen júrgizilýi tıis, – dep túsindirdi sotta.
Sot anyqtaǵandaı, jer ýchaskesi 2020 jyly alynǵan. Alaıda osy ýaqytqa deıin bılik organdary májbúrlep ıelikten shyǵarý rásimin zań talaptaryna saı aıaqtamaǵan.
Bul menshik quqyǵyn buzý dep tanylyp, Jer qatynastary basqarmasyna jer ıesine ótemaqy tóleý mindeti júkteldi.
Sot sheshimi men jeke uıǵarym zańdy kúshine endi.
Budan buryn Shymkentte ákimdiktiń 10 jyl buryn qabyldaǵan zańsyz sheshimi sot arqyly kúshin joıǵanyn jazǵan edik.
