Shymkentte jeńisti jaqyndatqandarǵa páter kilti tapsyryldy
ShYMKENT. KAZINFORM – Búgin 9 mamyr - Jeńis kúni. Bul jeńis kúni ońaı kelgen joq. Sondyqtan ekinshi dúnıejúzilik soǵys halqymyz úshin eń qasiretti kezeń bolyp tarıhta qalady. Otanyn qorǵap ajdahanyń aýzynan qaıtqan ata-apalarymyzdyń teńdessiz erligi, otanshyldyq nárine sýarylǵan bıik parasaty, asqaq adamı bolmysy bizge máńgilik ónege, ómirlik mektep, izgilik pen adamgershilik etolony bolyp qala beredi.
Jyldar jyljyp, sol surapyl kezeńnen alystaǵan saıyn, beıbit kún syılaǵan soǵys ardagerlerine degen qurmetimizdiń eselene túseri anyq. Óıtkeni, zymyraǵan ýaqytpen birge ańyzǵa aınalyp bara jatqan soǵystyń aqıqatyn aıtatyn ardagerlerimzdiń de qatary tym sırep barady.
Búgin shymkenttikter de Jeńis kúnin atap ótý úshin «Dańq memorıalyna» jınaldy. Qaza bolǵan qaharmandardyń rýhyna taǵzym etip, esimderi qashalyp jazylǵan eskertkish taqtaǵa gúl shoqtaryn qoıdy. Saltanatty sharada batyr babalardyń qaısarlyǵy men batyldyǵy dáripteldi.
Sonymen birge Memleket basshysy Q.Toqaevtyń soǵys jáne tyl ardagerlerin Jeńis kúnimen quttyqtaý hatyn qala ákimi oqyp berdi.
Al qalada alapat soǵysqa qatysqandardan 2 ardager bar. Olardyń biri - Nına Egorovna Mosýnova. 100 jastaǵy maıdanger ájeı soǵys kezinde radıst bolǵan. Ekinshi maıdanger - Brest qamaly, Varshava, Dansk, Vıssmark qalalary úshin shaıqasqan Murataly Tólepbergen aqsaqal. Ol qan maıdan shebinde jan aıamaı, erlik kórsetkeni úshin «Uly Otan soǵysy», «Germanııany jeńgeni úshin», «Varshavany azat etkeni úshin» ordenderimen marapattalǵan.
Ákim búgin Jeńis kúnin jaqyndatqan eki ardagerdi merekelerimen quttyqtaı otyryp, eki maıdangerge páter kiltin tabystady.
«Búgin biz beıbit aspan astyndaǵy búgingideı mamyrajaı ómir syılaǵan batyrlarǵa qurmet kórsetemiz. Biz Jeńistiń qundylylyǵyn eshqashan umytpaımyz »- dedi, óz quttyqtaýynda qala ákimi Ǵabıt Syzdyqbekov.
Óz kezeginde maıdangerler kórsetilgen qurmetke sheksiz alǵystaryn bildirip, batalaryn berdi.
