Shymkentte jeńil ónerkásip mamandaryna arnalǵan press-týr ótti
ShYMKENT. KAZINFORM – Jumysshy mamandyqtar jyly aıasynda Shymkent qalasynda jeńil ónerkásip salasynyń mamandaryna arnalǵan arnaıy press-týr uıymdastyryldy.
Sharanyń orny — jeńil ónerkásip jáne servıs salasynda kadrlar daıarlaıtyn jetekshi oqý orny — Jeńil ónerkásip jáne servıs kolledji.
Press-týrdyń negizgi maqsaty — kolledjdiń bilim berý múmkindikterin, túlekterdiń jetistikterin jáne qazirgi eńbek naryǵynda suranysqa ıe mamandyqtardy tanystyrý boldy.
Іs-shara barysynda qatysýshylar aldymen kolledj basshylyǵymen kezdesti. Kolledj dırektory Gúlmıra Japbarqyzy baspasóz ókilderiniń suraqtaryna jaýap berip, bilim berý mekemesiniń áleýeti týraly keń kólemde aqparat usyndy. Ol oqý ornynyń joǵary deńgeıdegi múmkindikterin atap ótti:
— Jeńil ónerkásip jáne servıs kolledji — Shymkent qalasynda jeńil ónerkásip salasyna mamandar daıarlaıtyn bazalyq oqý orny bolyp tabylady. 2017 jyly biz «Úzdik kolledj» nomınatsııasyn jeńip aldyq. Qazirgi tańda oqý protsesi úsh korpýs boıynsha júrgiziledi. Barlyq ǵımarattar sanıtarlyq talaptarǵa saı jabdyqtalǵan jáne 558 oryndyq oqý kabınetteri bar. Kolledjde 9 oqý sheberhanasy men 10 quzyrettilik ortalyǵy zamanaýı qural-jabdyqtarmen qamtamasyz etilgen. Stýdentterimiz 2014 jyldan beri dýaldy oqytý júıesi boıynsha bilim alýda, onyń 40 paıyzy — teorııalyq, 60 paıyzy — óndiristik tájirıbe. Qazirgi kezde 527 stýdent dýaldy júıede bilim alýdamyz. Sonymen qatar, biz Shymkent qalasynyń 35 kásipornymen seriktestik ornatyp, túlekterdiń eńbek naryǵyna tikeleı shyǵýyna múmkindik beremiz, — dedi.
Jıyn barysynda stýdentterdiń avtorlyq úlgilerinen turatyn sán kórsetilimi uıymdastyrylyp, qatysýshylarǵa kolledjdiń shyǵarmashylyq múmkindikteri tanystyryldy. Sondaı-aq, Coworking alańy men jastarǵa arnalǵan zamanaýı shyǵarmashylyq kabınetter kórsetildi. Kolledjde qoldanylatyn qural-jabdyqtardyń qatarynda japondyq JUKI, Kanzai, ıtalııalyq Rotondi jáne túrkııalyq Özbilim brendteri bar, olardyń barlyǵy WorldSkills standarttaryna sáıkes keledi. Bul bilim berý úrdisiniń sapasyn arttyrýǵa úlken septigin tıgizedi.
Press-týrdyń ekinshi bóliminde qatysýshylar «Ońtústik» arnaıy ekonomıkalyq aımaǵyndaǵy Jeńil ónerkásip jáne servıs kolledjiniń Quzyrettilik ortalyǵyna bardy. Munda «Sán tehnologııasy» boıynsha respýblıkalyq daıyndyq alańynyń jumysymen tanysty. Qonaqtar zamanaýı qural-jabdyqtarmen jabdyqtalǵan ortalyqtyń múmkindikterin kórip, stýdentterdiń tájirıbelik sabaqtaryn baqylady.
Sonymen qatar, baspasóz ókilderi kolledjdiń seriktes kásiporyndaryn aralap, olardyń óndiristik úrdisimen tanysty. Aldymen «AGF» tigin fabrıkasynyń jumysymen tanystyrylyp, kıim tigý tehnologııalary men stýdentterdiń óndiristik tájirıbeden ótý múmkindikteri kórsetildi. Keıin «Nazar-Tekstıl» kilem fabrıkasyna baryp, óndiristik qýat, ónim sapasy jáne eksporttyq áleýet jaıly aqparat berildi.
Aıta ketý kerek, kolledj stýdentteri halyqaralyq arenada da úlken jetistikterge qol jetkizip keledi. Olar WorldSkills, EuroSkills jáne Abilympics chempıonattarynyń jeńimpazdary atanyp, 2024 jyly Frantsııamen birlesip halyqaralyq salalyq akkredıtatsııadan ótken. Túrkııadaǵy kolledjder jáne «Denızlı» ındýstrııalyq aımaǵymen seriktestik baılanystar ornatylǵan. Búginde stýdentterdiń 10 startap jobasy júzege asyrylyp, oǵan 40-qa jýyq jas qatysýda. Arnaıy bilim berý qajettilikteri bar stýdentter de Abilympics chempıonattarynda júldeli oryndarǵa ıe bolyp júr.