Shymkentte jekemenshiktegi keıbir áleýmettik nysandar memleketke qaıtarylyp jatyr

ShYMKENT. KAZINFORM – Shymkentte erterekte ártúrli jolmen jekemenshikke ótip ketken áleýmettik mańyzdy nysandar memleketke qaıtarylyp jatyr. Bul týraly qala ákimi Ǵabıt Syzdyqbekov aıtty.

«Qazirgi tańda júzege asyp jatqan taǵy bir mańyzdy bastamamyz bar. Erterekte ártúrli joldarmen áleýmettik mańyzdy nysandar jekemenshikke ótip ketken. Osy nysandardyń barlyǵyna zerdeleý júrgizilip, birqatar menshik ıeleri tarapynan maqsatsyz paıdalaný jáne talaptardy oryndamaý faktileri anyqtaldy. Biz tek jumysy zańǵa qaıshy nysandardy memleketke qaıtarý máselesin kóterdik. Al, jumysy adal, óz mindettemelerin merziminde oryndap jatqan menshik ıelerine alańdaýǵa negiz joq. Ózderińiz biletindeı, ótken jyly qaladaǵy burynǵy «Fosforshylar saraıyn» memleket menshigine qaıtaryp, ǵımarat jaramsyz bolýyna baılanysty buzý jumystary aıaqtaldy. Aldymyzdaǵy jyly demeýshiler esebinen ornyna jańa mádenı nysan salý kózdelýde», - dedi qala basshysy.

Sondaı-aq, ol bıyl qysqy sport túrlerimen shuǵyldanatyn jekemenshik ıeligine ótken qaladaǵy jalǵyz «Muz saraıynyń» 67 paıyz úlesi memleket menshigine ótkenin aıtty. Bul degenimiz endigi jerde nysannyń basqarý quqyǵy memleketke tıesili ekenin bildiredi.

«Sondaı-aq, óz mindetterin oryndamaǵan jeke kásipkerge senimgerlik basqarýǵa berilgen №2 qalalyq emhananyń kelisim shartyn buzyp, memleketke qaıtardyq. Sol sııaqty mindettemeni oryndamaǵan satyp alý quqyǵymen senimgerlik basqarýǵa berilgen «Ortalyq sý sport keshenin» memleketke qaıtarý boıynsha sotta talap aryz qaralýda. Odan bólek, qala turǵyndarynyń usynysyn eskerip, kommertsııalyq baǵytqa paıdalanyp kelgen «Qııal álemi» tehnoparki jáne «Keń baba» saıabaǵyn memleket menshigine qaıtaryp, demeýshiler esebinen qaıta abattandyrý jumystaryn qolǵa aldyq. «Qııal álemi» saıabaǵyna irgeles jatqan aýmaqta qurylysy aıaqtalmaǵan saýda ortalyǵynyń jeri memleketke qaıtaryldy. Endi qurylys nysanyn buzý boıynsha is sotta qaralýda. Sol sııaqty «Sý Resýrstary Marketıng» JShS-n jekeshelendirý qujattaryn zerdeleý barysynda birqatar kemshilik anyqtaldy. Mekemeniń jumysyna da qatysty birqatar másele bar. Búginde zańǵa sáıkes tıisti jumystar júrgizilýde», - dedi ol OKQ alańynda.

Qala basshysy Shymkentte óńdeý ónerkásibi salasynda 12 joba iske qosylyp, 1000-nan astam jańa jumys orny ashylǵanyn aıtty.

Qalada jańadan 2 ındýstrııalyq aımaq iske qosyldy.

Shymkentte elimizdegi eń úlken jylyjaı salynatyn boldy.

«Jaıly mektep» ulttyq jobasy aıasynda qalada 28 myń oqýshyǵa arnalǵan 18 mektep salynady.

Sondaı-aq, jyl sońyna deıin Shymkentte áleýmettik turǵyn úı kezeginde turǵan 2 094 adamǵa páter beriletin boldy.