Shymkentte jeke sot oryndaýshy jarty mıllıonnan astam teńgeni ıemdenip alǵan

ShYMKENT. KAZINFORM - Shymkentte jeke sot oryndaýshy bereshekti óteýge arnalǵan 556 953 teńgeni óz shotyna aýdaryp, aqshany ıemdenip alǵan.

Qalalyq prokýratýra málimetinshe, sot sheshimimen boryshker talapkerge 1 mln 275 myń teńge tóleýge mindetti bolǵan. Bul soma boryshkerdiń aılyq jalaqysynan aı saıyn óndirilip, jeke sot oryndaýshynyń esep shotyna aýdarylyp otyrǵan.

Alaıda ol aqshany óz qajettiligine jaratyp jibergen. 

Atalǵan fakti boıynsha jeke sot oryndaýshynyń ústinen Qylmystyq kodekstiń 251-baby 1-bóligimen (Jekeshe notarıýstardyń, baǵalaýshylardyń, jeke sot oryndaýshylarynyń, medıatorlardyń jáne aýdıtorlyq uıym quramynda jumys isteıtin aýdıtorlardyń ókilettikterdi teris paıdalanýy) is qozǵaldy.

Sotqa deıingi tergep-tekserý kezinde taraptardyń tatýlasýyna baılanysty is toqtatylǵan. 

«Josyqsyz jeke sot oryndaýshysy respýblıkalyq jeke sot oryndaýshylar palatasynyń músheliginen shyǵaryldy», - dedi qalalyq prokýratýra.