Shymkentte jastar saıasaty jáne balalardyń quqyqtaryn qorǵaý basqarmalary qurylady

ShYMKENT. KAZINFORM – Shymkent qalasynda jastar saıasaty men balalardyń quqyqtaryn qorǵaý máselelerin kúsheıtý maqsatynda eki jańa basqarma qurylady. Bul týraly qala ákiminiń orynbasary Sársen Quranbek málimdedi.

Spıkerdiń aıtýynsha, qala ákiminiń usynysy men máslıhattyń sheshimi negizinde ishki saıasat jáne jastar isi basqarmasyn qaıta qurý arqyly «Jastar saıasaty basqarmasy» jeke qurylym retinde bólinip shyǵady. Sondaı-aq, balalardyń quqyqtaryn qorǵaý, býllıngtiń aldyn alý jáne kámeletke tolmaǵandar arasyndaǵy quqyqbuzýshylyq máselelerin júıeli sheshý úshin «Balalardyń quqyqtaryn qorǵaý basqarmasy» qurylatyn boldy. Bul jańa qurylym bilim basqarmasynan bólinip, qorǵanshylyq jáne qamqorshylyq bólimin óz qaramaǵyna alady.

– Bul bastama jastar saıasatyn alǵa ilgeriletý men bala quqyqtaryn qorǵaýda naqty nátıjeler beredi dep senemiz. Jalpy basqarmalardy qurýǵa shamamen 2–2,5 aı ýaqyt qajet. Jańa jylǵa deıin barlyq uıymdastyrý jumysy tolyq aıaqtalady, – dedi Sársen Quranbek.

Resmı derek boıynsha, Shymkentte 14 pen 35 jas aralyǵynda 400 myńǵa jýyq jas bar, bul eki Ulytaý oblysynyń halqy shamalas. Qaladaǵy balalar sany 520 myńǵa jetip, Soltústik Qazaqstan oblysynyń turǵyndarymen teńesedi.

– Osy kórsetkishter jastar isi jáne bala quqyǵyn qorǵaý baǵytynda jeke basqarmalardyń qajettiligin aıqyndap otyr. Jańa qurylymdar qosymsha shtat ashpaı-aq, ákimdikke bekitilgen kadrlyq shektiń sheńberinde jumys isteıdi, – dep atap ótti qala ákiminiń orynbasary.

Sonymen qatar, Sársen Quranbek qalalyq bilim basqarmasynyń basshysy óz ótinishimen qyzmetinen ketkenin, al ishki saıasat jáne jastar isi basqarmasynyń basshysy bala kútimine baılanysty demalys alǵanyn habarlady.

Aıta keteıik, budan buryn Shymkenttegi «Keń baba» saıabaǵy túpkilikti memleket menshigine ótkenin jazǵan bolatynbyz.