Shymkentte jarnama tólemin esepteý kásipkerler arasynda túsinbeýshilik týdyrdy
ShYMKENT. KAZINFORM – Shymkentte syrtqy (vızýaldy) jarnamany ornalastyrý úshin alynatyn tólemder men ósimpuldardy esepteý tártibi boıynsha máseleler týyndady. Osyǵan baılanysty birqatar kásipker Kásipkerler palatasyna júginýge májbúr boldy.
Bıznes qoǵamdastyq ókilderiniń aıtýynsha, 30-dan astam kásipker syrtqy jarnama tóleminiń eseptelgenin tek merzimi ótkennen keıin ǵana bank qosymshalary arqyly bilgen. Olar esepshottarynyń buǵattalý qaýpi bar ekenin jetkizdi.
Kásipkerler budan bólek birqatar máseleni kóterdi. Olardyń aıtýynsha, eseptelgen tólem somasy naqty ornalastyrylǵan jarnamanyń kólemine sáıkes kelmeıdi, al sórelerdegi beıneler negizsiz túrde jarnamaǵa teńestirilgen. Sondaı-aq tólemniń esepteletini týraly aldyn ala habarlanbaǵan, ári anyqtalǵan buzýshylyqtardy erikti túrde joıýǵa múmkindik berilmegen.
Budan bólek, negizgi tólem men ósimpul bir mezgilde eseptelip, keıbir kásipkerler jarnama elementterin buǵan deıin alyp tastaǵanyna qaramastan, olarǵa da tólem júktelgenin alǵa tartty.
Osyǵan baılanysty Shymkent qalalyq memlekettik kirister departamenti basqarmasynyń basshysy Jomart Aryntaev jaýap berip, jaǵdaıdy túsindirdi.
Onyń málimdeýinshe, kásipkerlik sýbektilerge eseptelgen tólemder monıtorıng nátıjeleri boıynsha jergilikti atqarýshy organnan salyq organdaryna berilgen málimetter negizinde esepteledi.
– Zańnamaǵa sáıkes, belgilengen mindetti tólemder men salyqty tóleý – ár azamattyń, kásipkerlik sýbektisiniń mindeti. Al syrtqy jarnama tóleýshiler – jarnama nysandarynyń menshik ıeleri nemese jarnama ornalastyrylǵan ǵımarattyń menshik ıeleri. Syrtqy jarnama boıynsha túsim jergilikti bıýdjetke túsedi. Ár aıdyń 15-inen keshiktirilmeı ýákiletti organ bizge qajet málimetterdi usynady. Soǵan sáıkes ár salyq tóleýshige mindetti tólemder usynylady. Ol avomatty túrde ekinshi deńgeıli bankterdiń qosymshasy arqyly beriledi, – dedi ol.
Shymkent qalalyq kásipkerler palatasy janyndaǵy Keńes kásipkerlerdiń quqyqtary men zańdy múddelerin qorǵaý jáne zańnamany birizdi qoldaný maqsatynda prokýrorlyq sharalardy qoldanýdy oryndy dep tanydy.
– Qalyptasqan jaǵdaıdy jan-jaqty qaraý qajet dep eseptelip, kásipkerlerdiń ár ótinishi boıynsha ýákiletti organdardyń áreketterine quqyqtyq baǵa beriledi. Kez kelgen kásipker Palata arqyly nemese prokýratýraǵa tikeleı jazbasha nemese elektrondy túrde shaǵym aıtyp, óz dáıekterin usyna alady. Ár naqty jaǵdaı Kásipkerler palatasymen birlesip muqııat zerttelip, quqyq buzýshylyqtar anyqtalǵan jaǵdaıda kásipkerlerdiń quqyqtary zańda belgilengen tártippen qalpyna keltiriledi, – dedi Shymkent qalalyq prokýratýrasynyń basqarma basshysy Batyr Ergeshov.
Buǵan deıin Shymkent kóshelerindegi jarnama ekranynda ádepsiz jazba paıda bolǵanyn jazǵan edik.