Shymkentte jappaı tóbeles bolyp, úsh adam qamaýǵa alyndy

ShYMKENT. KAZINFORM - Shymkentte kóshede bolǵan tóbeles qoǵamdyq rezonans týdyrdy. Áleýmettik jelilerde bir top jastyń jol ústinde janjal shyǵaryp, tóbeles uıymdastyrǵany beınelengen vıdeo tarady. 

Shymkent qalalyq polıtsııa departamentiniń málimetinshe, atalǵan oqıǵa boıynsha «Buzaqylyq» babymen qylmystyq is qozǵaldy.

– Oqıǵaǵa qatysýshylardyń barlyǵy jedel túrde anyqtalyp, ustaldy. Jol ústindegi janjal ashyq tóbeleske ulasyp, qoǵamdyq tártip pen azamattardyń qaýipsizdigi óreskel buzyldy. Úsh kúdikti ýaqytsha ustaý ızolıatoryna qamaldy, – delingen vedomstvo habarlamasynda.

Qazirgi ýaqytta qajetti tergeý áreketteri júrgizilip jatyr.

– Árbir qatysýshynyń áreketine quqyqtyq baǵa beriledi. Kináliler zańǵa sáıkes jaýapkershilikke tartylady, – dep habarlady quqyq qorǵaý organdary.

Budan buryn Shymkentte jol ortasynda tóbelesip, kisi óltirgen kúdiktiler ustalǵanyn jazǵan edik.