Shymkentte jáne Túrkistan oblysynda elektr jelilerin jańǵyrtý baǵytyndaǵy ilki jobalar aıaqtaldy
ASTANA. KAZINFORM - Energetıka jáne kommýnaldyq sektorlardy jańǵyrtý jónindegi Ulttyq joba aıasynda «Ońtústik Jaryq Tranzıt» JShS Shymkent qalasy men Túrkistan oblysynda eki pılottyq jobany iske asyrýdy aıaqtady, dep habarlaıdy QR Ulttyq ekonomıka mınıstrliginiń baspasóz qyzmeti.
Shymkent qalasynda kerneýi 35 kV «L-Kaıtpas» jáne «L-XXI Partsezd» áýe elektr berý jelilerin qaıta jańǵyrtý jumystary júrgizildi. Jalpy uzyndyǵy 14,37 km bolatyn jelilerde bolat-alıýmınıı sym zamanaýı joǵary temperatýraǵa tózimdi, kompozıtti ózekti symǵa aýystyryldy.
Jobany Shymkent qalasynda iske asyrý jeliniń ótkizý qabiletin 27 MVt-qa arttyrýǵa, shamamen 24 myń abonentti elektr energııasymen jabdyqtaýdyń senimdiligi men sapasyn jaqsartýǵa, sondaı-aq jelilerdiń tozý deńgeıin 81%-dan 20%-ǵa deıin tómendetýge múmkindik berdi.
Innovatsııalyq kompozıtti symdy qoldaný tirekterdi aýqymdy qaıta jańǵyrtýsyz-aq jelilerdiń júktemelik qabiletin arttyrýdy qamtamasyz etedi, jabdyqtardyń qyzmet etý merzimin uzartady jáne elektr energııasynyń tehnologııalyq shyǵyndaryn azaıtady.
Túrkistan oblysynda kerneýi 0,4 kV bolatyn áýe elektr berý jelileriniń 31 nysanynda jalpy uzyndyǵy 89,763 km qaıta jańǵyrtý jumystary júrgizildi. Joba aıasynda tozǵan tirekter temirbeton konstrýktsııalaryna aýystyrylyp, ózdiginen tireletin oqshaýlanǵan symdar (ÓTOS) engizildi. Nátıjesinde jelilerdiń tozý deńgeıi 87,3%-dan 0%-ǵa deıin tómendep, 3 582 abonentti elektrmen jabdyqtaýdyń senimdiligi artty, apattylyq edáýir qysqaryp, elektr jelilerin paıdalaný qaýipsizdigi joǵary deńgeıge kóterildi.
ÓTOS tehnologııasyn qoldaný tehnologııalyq zańbuzýshylyqtardy barynsha azaıtýǵa, symdardyń aıqasýy saldarynan týyndaıtyn qysqa tuıyqtalýlardy boldyrmaýǵa jáne jelilerdiń qolaısyz aýa raıy jaǵdaılaryna tózimdiligin arttyrýǵa múmkindik beredi.
Jobalardy qarjylandyrý úshin «Bank TsentrKredıt» AQ-da kredıttik jeli tartylyp, «Qazaqstandyq Turǵyn úı kompanııasy» AQ tarapynan qaryz boıynsha paıyzdyq mólsherlemeni sýbsıdııalaý jóninde oń sheshim qabyldandy. Qaryz qarajaty tolyq kólemde ıgerilip, merdiger uıymdarmen esep aıyrysýǵa baǵyttaldy.
Pılottyq jobalardy iske asyrý elektr jelilik keshenge zamanaýı tehnologııalyq sheshimderdi engizýge, ınfraqurylymdyq tozýdy azaıtýǵa, energııa tıimdiligin arttyrýǵa jáne óńirdiń 27,5 myńnan astam tutynýshysy úshin elektrmen jabdyqtaý sapasyn jaqsartýǵa yqpal etedi.
«Ońtústik Jaryq Tranzıt» JShS elektr jelilik ınfraqurylymdy jańǵyrtý boıynsha júıeli jumysty jalǵastyryp, halyq pen bıznesti senimdi ári turaqty energııamen qamtamasyz etýde.
Osyǵan deıin Batys Qazaqstan 2027 jyldyń sońyna deıin Birtutas elektr energetıkalyq júıege qosylatyny týraly jazdyq.
