Shymkentte jańadan salynǵan jol opyrylyp, turǵyndar sýsyz qaldy
ShYMKENT. KAZINFORM – Qyzyljar shaǵynaýdany Aqtorǵaı kóshesinde asfalt tóselgen jol ýchaskesinde topyraq shógip, saldarynan sý qubyry isten shyqty.
Turǵyndar ortalyq káriz júıesi bar jerde joldyń búlingenin aıtyp, 109 biryńǵaı baılanys ortalyǵyna habarlasqan. Sý arnasynyń mamandary kelgenimen, qubyrlardy jóndeýden bas tartyp, jaýapkershilik joldy salǵan merdiger uıymǵa júkteletinin jetkizgen.
Osyǵan qatysty Kazinform tilshisine Shymkent qalasy jolaýshylar kóligi jáne avtomobıl joldary basqarmasy resmı túsinik berdi.
Vedomstvonyń málimetinshe, atalǵan kóshege asfaltbeton jabyndysy 2025 jyldyń shilde-tamyz aılarynda «Atash Trans Logistics» JShS merdiger uıymy tarapynan tóselgen.
Sondaı-aq joldyń negizin nyǵyzdaý kezeńinde «Ulttyq sapa ortalyǵy» tarapynan tıisti saraptamalyq jumystar júrgizilgen.
– Basqarma mamandary júrgizgen tekserý nátıjesinde Aqtorǵaı kóshesiniń belgili bir bóliginde buǵan deıin káriz qubyrlaryn tóseý jumystary atqarylǵany anyqtaldy. Atalǵan aýmaqta topyraqtyń otyrýy saldarynan jol jabyny shókken. Aqaýlardy joıý maqsatynda qalpyna keltirý jumystary josparǵa engizildi. Qazirgi tańda jaýapty merdiger uıym tıisti daıyndyq jumystaryn júrgizip jatyr. Jóndeý jumystary 2025 jylǵy naýryz aıynyń sońyna deıin tolyq aıaqtalady dep josparlanyp otyr, - delingen basqarmanyń jaýabynda.
Budan buryn Shymkentte eki kósheniń qıylysynda asfalt opyrylyp qalǵanyn jazǵan edik.