Shymkentte jańa jolaıryq ashylyp, áýejaıdyń ekinshi ushý-qoný jolaǵy salynady
ASTANA. KAZINFORM — Premer-mınıstr Oljas Bektenov Shymkent qalasyna jumys sapary aıasynda megapolıstiń áleýmettik-ekonomıkalyq damýymen jáne Prezıdent Qasym-Jomart Toqaevtyń óńir ekonomıkasynyń jańa ósý baǵyttaryn damytý jáne avtojoldar sapasyn jaqsartý jónindegi tapsyrmalarynyń oryndalý barysymen tanysty.
Atap aıtqanda, «Juldyz» jáne «Tassaı» ındýstrııalyq aımaqtaryna baryp, Báıdibek bı dańǵyly men Q.Tólemetov kóshesiniń qıylysyndaǵy kólik aıryǵy ýchaskesin qarap shyqty.
«Juldyz» ındýstrııalyq aımaǵynda Wan Sheng Ceramic keramogranıtten jasalǵan buıymdar shyǵaratyn zaýyttyń bas dırektory Lıý Ventsın bıyl kásiporyn jylyna 12-13 mln m2 ónim óndiretin tolyq jobalyq qýatqa shyqqanyn baıandady.
Munda 350 turaqty jumys orny ashylǵan, aralas uıymdardy esepke alǵanda, 1 myńnan astam adam jumyspen qamtylǵan.
Paıdalanylatyn shıkizattyń shamamen 95%-y Qazaqstan aýmaǵyndaǵy ken oryndarynan alynady.
Kompanııa ishki naryqty qamtamasyz etýmen qatar, ónimniń 40%-yn TMD elderine eksporttaıdy. Óndiristi odan ári keńeıtý josparlanyp otyr.
«Tassaı» alańynda «Asia Trafo» JShS basqarma tóraǵasy Dáýirbek Ateev Premer-mınıstrge tehnologııalyq protsesi jáne shyǵarylatyn jabdyq túrleri, sonyń ishinde kúshtik transformatorlary, avtotransformatorlar jáne basqa da ónimder týraly baıandady. Munda úshólshemdi jobalaý, matematıkalyq modeldeý jáne tsıfrlyq basqarý tehnologııalary engizildi. Jobalyq qýaty jylyna 12 myń MVA, bul Qazaqstannyń 500 kV deıingi kerneý klasyndaǵy qosalqy stansalyq jabdyqtardyń negizgi túrlerine degen qajettiliginiń 90%-yna deıin qamtamasyz etýge múmkindik beredi. Jalpy, transformatorlar iri energetıkalyq nysandarǵa, sonyń ishinde jańa jylý elektr ortalyqtary men elektr stansalaryn salý úshin jetkiziledi. Zaýyt 200-den astam adamdy jumyspen qamtyp otyr.
Shymkentte jalpy 8 ındýstrııalyq aımaq jumys isteıdi, olardyń aýmaǵy 90%-ǵa tolǵan, onda 354 joba júzege asyrylǵan. Shymkent qalasy ákimdiginiń málimetinshe, 2025 jyly jalpy óńirlik ónim kólemi 5,9 trln teńgege jetip, sońǵy bes jylda 2,2 ese ósken.
2026 jylǵy qańtar – qyrkúıekte ónerkásip óndirisiniń kólemi 1,2 trln teńgeni qurap, ótken jyldyń sáıkes kezeńimen salystyrǵanda 12,9%-ǵa artty. Negizgi kapıtalǵa salynǵan ınvestıtsııalar 7,4%-ǵa, 580 mlrd teńgege deıin ósti. Kásipkerlikti qoldaý sharalarymen 10,5 mlrd teńge somasyna 1 480 joba qamtyldy. Áleýmettik mańyzdy baǵyttarǵa, onyń ishinde bilim berý, densaýlyq saqtaý ınfraqurylymyn jańǵyrtýǵa, azamattardy áleýmettik qamtamasyz etýge 439,5 mlrd teńgeden astam qarjy qarastyrylǵan.
Sapar qorytyndysy boıynsha Oljas Bektenov ónerkásip jáne qurylys, energetıka, syrtqy ister mınıstrlikterine jáne Shymkent ákimdigine zaýyttardyń aǵymdaǵy qýatyn keńeıtý úshin qajetti qoldaý sharalaryn qabyldaýdy, sondaı-aq ındýstrııalyq aımaqtar aýmaǵynyń tolyq júktelýin qamtamasyz etýdi jedeldetýdi tapsyrdy.
Jumys sapary barysynda Premer-mınıstr Báıdibek bı dańǵyly men Q. Tólemetov kóshesiniń qıylysyndaǵy kólik aıryǵy qurylysynyń barysymen de tanysty. Jobada uzyndyǵy 550 metrge jýyq estakadasy, uzyndyǵy 180 metrden asatyn jol ótpesi jáne úsh jerasty jaıaý júrginshiler ótkeli bar tórt jolaqty jol aıryǵyn salý kózdelgen. Jobanyń quny 8,5 mlrd teńgeni quraıdy. Negizgi qurylys-montaj jumystary aıaqtaldy, kópirdiń ústi arqyly qozǵalys ashyldy. Tómendegi jumystardy osy jyldyń sońyna deıin aıaqtaý josparlanýda.
Jalpy alǵanda, qala joldarynyń uzyndyǵy 3,8 myń shaqyrymdy quraıdy. Shymkent qalasy ákiminiń birinshi orynbasary Aıdyn Kárimov sońǵy úsh jylda 1,8 myń shaqyrym jolǵa asfalt tóselgenin, jaqsy jaǵdaıdaǵy joldardyń úlesi 95%-ǵa jetkenin baıandady. Qalaǵa kún saıyn 140 myńǵa deıin avtokólik kiredi, onyń shamamen 80 myńy tranzıt arqyly ótedi. Kólik júktemesiniń artýyna baılanysty bıyl P.Momynov jáne K.Tilenshın kóshelerindegi jol ótkelderi arqyly kólik qozǵalysy ashyldy. Báıdibek bı – Q.Tólemetov kósheleriniń qıylysyndaǵy jolaıryqty paıdalanýǵa berý kóshe-jol jelisiniń ótkizý múmkindigin arttyryp, kólik júktemesin azaıtýǵa jáne qozǵalys qaýipsizdigin jaqsartýǵa múmkindik beredi.
Sonymen qatar Shymkent áýejaıyn rekonstrýktsııalaý jumystarynyń barysy baıandaldy. Joba aıasynda jalpy quny 46,1 mlrd teńge bolatyn ekinshi ushý-qoný jolaǵy men rýlej joldar salý kózdelgen. Jumystardy 2027 jyly aıaqtaý josparlanǵan.
Premer-mınıstr ınfraqurylymdyq jobalardyń júzege asyrylýyn, onyń ishinde merdiger uıymdardyń jumysyn baqylaýdy kúsheıtýdiń mańyzdylyǵyn atap ótti.
— Memleket basshysy halyqaralyq jáne jergilikti mańyzy bar avtomobıl joldarynyń sapasyn jaqsartýdy tapsyrdy. Búginde jol qurylysy standarttary men olardyń jaı-kúıin baǵalaý júıesin qaıta qaraıtyn arnaıy Úkimettik jumys toby quryldy. Bul saladaǵy tártipti retke keltirip, óńirlik jáne aýdanaralyq joldardyń qanaǵattanarlyqsyz jaǵdaıyna sebep bolatyn faktorlardy joıý qajet. Jergilikti jerlerde ákimdikter jappaı baqylaý men tsıfrlandyrý arqyly bıýdjet qarajatynyń tıimdi jumsalýyn qamtamasyz etýge tıis. Qalanyń ósýin eskersek, Shymkent úshin de joldardy sapa men qaýipsizdiktiń jańa zamanaýı tehnologııalaryn qoldana otyryp salý mańyzdy, — dep atap ótti Oljas Bektenov.
Buǵan deıin elde irimshik zaýyty salynyp, spýtnık óndirisi jolǵa qoıylýy múmkin ekenin jazǵanbyz.
