Shymkentte jańa Japon saıabaǵy ashyldy
ASTANA. KAZINFORM - Qazaqstan Respýblıkasy Premer-mınıstriniń birinshi orynbasary Nurlybek Nálibaev Shymkent qalasyna jumys sapary barysynda qalalyq ortany damytý, óndiristik áleýetti arttyrý jáne áleýmettik ınfraqurylymdy jańǵyrtý baǵytynda júzege asyrylyp jatqan birqatar jobamen tanysty, dep habarlaıdy Úkimettiń baspasóz qyzmeti.
Sapar aıasynda Nurlybek Nálibaev Qala kúni merekesine oraı ashylǵan jańa Japon saıabaǵynyń saltanatty ashylý rásimine qatysty. Іs-sharaǵa qala ákimi Ǵabıt Syzdyqbekov, megapolıs turǵyndary men qonaqtary jınaldy.
Aýmaǵy 2,3 gektardy quraıtyn jańa qoǵamdyq keńistik burynǵy «Keń baba» saıabaǵynyń ornynda boı kótergen. Ótken jyly memleket menshigine qaıtarylǵan aýmaq zańsyz nysandardan tazartylyp, keshendi abattandyrý jumystary júrgizilgen. Joba qalanyń tarıhı mańyzy bar aýmaqtary biriniń bastapqy qyzmetin qalpyna keltirip, turǵyndar úshin jańa demalys keńistigin qalyptastyrýǵa múmkindik berdi.
Japon saıabaǵy adam men tabıǵat arasyndaǵy úılesim fılosofııasyna negizdelgen. Munda sakýra alleıalary, tas baqtary, sý ústindegi demalys oryndary, japon aýyldary, kórkem serýen joldary, medıtatsııa aımaqtary, sándik tuqy balyqtary bar toǵandar men arnaıy fotoaýmaqtar ornalasqan.
Premer-mınıstrdiń birinshi orynbasary Shymkenttiń qarqyndy damyp kele jatqanyn atap ótip, Memleket basshysynyń tapsyrmalaryn oryndaý aıasynda qala turǵyndarynyń ómir súrý sapasyn jaqsartýǵa baǵyttalǵan jobalar júıeli túrde júzege asyrylyp jatqanyn aıtty. Sondaı-aq Qala kúnine oraı taǵy bir zamanaýı Ekopark paıdalanýǵa beriletinin jetkizdi.
Sonymen qatar Nurlybek Nálibaev «Juldyz» ındýstrııalyq aımaǵyndaǵy «Wan Sheng Ceramic» keramıkalyq taqtashalar zaýytynyń jumysymen tanysty. Qytaı ınvestorlarynyń qatysýymen júzege asqan jobaǵa 25,5 mlrd teńge ınvestıtsııa tartylyp, 350 turaqty jumys orny ashylǵan. Kásiporyn jylyna 12,7 mln sharshy metr keramogranıt ónimin óndiredi. Qazirgi ýaqytta óndiris qýatyn arttyrýǵa baǵyttalǵan ekinshi kezeńge daıyndyq júrgizilip jatyr.
Sondaı-aq Premer-mınıstrdiń birinshi orynbasary «Tassaı» ındýstrııalyq aımaǵynda ornalasqan «Asia Trafo» transformator zaýytyn aralady. Ortalyq Azııadaǵy iri elektrotehnıkalyq kásiporyndardyń biri sanalatyn zaýytta 250-ge jýyq adam eńbek etedi. Kásiporyn joǵary kerneýli transformatorlar shyǵaryp, jylyna 12 myń MVA-dan astam óndiristik qýatqa ıe.
Kásipkerlermen kezdesý barysynda Nurlybek Nálibaev Úkimettiń otandyq óndiristi qoldaýǵa daıyn ekenin atap ótti.
Sonymen qatar jumys sapary aıasynda Memleket basshysynyń tapsyrmasyna sáıkes salynyp jatqan 150 oryndyq zamanaýı ońaltý ortalyǵynyń qurylys barysy qaraldy. Bozaryq shaǵynaýdanynda ornalasqan nysannyń jalpy aýmaǵy 5,3 gektardy quraıdy. Joba bes bloktan turady jáne halyqaralyq standarttarǵa saı jabdyqtalady.
Ortalyqta І jáne ІІ toptaǵy múgedektigi bar azamattarǵa jartylaı statsıonarlyq jaǵdaıda arnaýly áleýmettik qyzmetter kórsetiledi. Keshen quramynda sport zaly, basseın, akt zaly, ońaltý korpýstary, ashana, statsıonar jáne qosymsha ınfraqurylymdyq nysandar qarastyrylǵan.
Qazirgi tańda qurylys jumystarynyń 65 paıyzy aıaqtalǵan. Jospar boıynsha nysan 2026 jyldyń jeltoqsan aıynda paıdalanýǵa beriledi.
Nurlybek Nálibaev qurylys jumystaryn jedeldetý múmkindigin qarastyryp, eń basty talap retinde qurylys sapasyn qamtamasyz etýdi tapsyrdy.
Jalpy, Shymkent qalasynda júzege asyrylyp jatqan jobalar qalalyq ortanyń sapasyn arttyrýǵa, óndiristik áleýetti nyǵaıtýǵa jáne turǵyndardyń áleýmettik ál-aýqatyn jaqsartýǵa baǵyttalǵan.
Osyǵan deıin Shymkentte burynǵy «Qııal álemi» ornynda zamanaýı City Park paıdalanýǵa berilgeni týraly jazdyq.
