Shymkentte jańa týǵan náresteniń júregine kúrdeli ota jasaldy

ShYMKENT. KAZINFORM — Shymkent qalalyq perınataldy ortalyǵynda salmaǵy nebári 1000 gramm, týǵanyna 45 kún bolǵan náresteniń júregine kúrdeli operatsııa jasaldy. 

25 aptasynda dúnıege kelgen shaqalaq 2 naýryz kúni ortalyqtyń náresteler reanımatsııa bólimine jetkizilgen. Sábıdiń salmaǵy nebári 655 gramm, boıy 28 santımetr bolǵan. Oǵan «ashyq arterıaldy ózek» (týa bitti júrek aqaýy) dıagnozy qoıyldy. Sondaı-aq, respıratorlyq dıstress-sındromy da anyqtalǵan.

Kúrdeli otany Shymkent qalalyq balalar klınıkalyq aýrýhanasynyń kardıohırýrgy Asan Jumanov pen Shymkent qalalyq perınataldy ortalyǵynyń anestezıolog-reanımatology Aqjol Abdraımov jasap shyqty.

Qazirgi tańda náresteniń jaǵdaıy birqalypty aýyr. Ol perınataldy ortalyq bas dárigeriniń neonataldy qyzmet boıynsha orynbasary Gúlmıra Býdýkova men neonatolog-reanımatolog Erasyl Shabetov bastaǵan neonataldy reanımatsııa bólimi dárigerleriniń turaqty baqylaýynda.

— Náresteniń jaǵdaıy óte aýyr bolǵandyqtan, birden ókpeni jasandy jeldetý apparatyna qosyldy. Kúrdeli dıagnozǵa baılanysty perınataldy ortalyqtyń dárigerleri qaladaǵy kardıohırýrg mamandarmen birneshe márte keńes ótkizdi. Sábıdiń jasy 45 kúnge tolyp, salmaǵy 1 kelige jetken kezde dárigerler júrekke operatsııa jasaýǵa sheshim qabyldady. Ashyq arterıaldy ózekke jasalǵan kúrdeli ota sátti aıaqtaldy, — delingen Shymkent qalasy densaýlyq saqtaý basqarmasynyń baspasóz qyzmeti usynǵan aqparatta.

Óz kezeginde, sábıiniń amandyǵy úshin jan aıamaı eńbek etip jatqan medıtsına qyzmetkerlerine anasy sheksiz alǵysyn bildirdi.

Aıta keteıik, budan buryn Shymkentte salmaǵy 7 keli bolatyn alyp sábı dúnıege kelgenin jazǵan bolatynbyz.