Shymkentte jańa tehnologııamen jabdyqtalǵan qoıma kesheni men jylyjaı ashylady
ShYMKENT. KAZINFORM – Otandyq óndiristi qoldaý jónindegi Premer-Mınıstrdiń tapsyrmasy aıasynda 1 mamyr kúni vıtse-premer Serik Jumanǵarın Shymkent qalasyna baryp, jumys istep turǵan iri óndiristik jáne aýyl sharýashylyǵy nysandarynyń jumysymen jáne qurylysy barysymen tanysty. Bul týraly Úkimettiń baspasóz qyzmeti habarlady.
Shymkent kólik-logıstıkalyq ortalyǵynyń aýmaǵynda aýdany 5 ga «NMI-ıÝg» JShS kópfýnktsıonaldy qoıma kesheni salynyp jatyr, jobanyń quny – 10,2 mlrd teńge. Qurylystyń birinshi kezeńin bıyl aıaqtaý josparlanyp otyr, atalǵan kezeńniń qurylys-montajdaý jumystary 90%-ǵa oryndalǵan. Qoıma úı-jaılarynyń jalpy aýdany 22 myń sharshy metrdi quraıdy. «NMI-ıÝg» JShS quryltaıshysy Aıjan Naımbekovanyń aıtýynsha, bul klımattyq baqylaýdyń ıkemdi júıesi, tońazytqysh kameralarynyń temperatýrasyn -18-den +4 gradýsqa deıin retteý múmkindigi bar A+ sanatyndaǵy qoıma bolady. Ol taýarlardyń keń assortımentin saqtaýdy qamtamasyz etedi.
Munda vıtse-premerge «Alsera kz» JShS jylyjaı keshenin salý jobasy tanystyryldy. Quny $650 mln bolatyn ınvestıtsııalyq jobany «Bozaryq» ındýstrııalyq aımaǵynda «Alarko Holding» túrik kompanııasy júzege asyrýda. Bul jańa tehnologııalardy qoldana otyryp, 500 ga alańda kezeń-kezeńimen iske asyrylatyn bolady. Munda qııar, qyzanaq, baqsha daqyldary, tamyr jemisti kókónister men basqa da aýylsharýashylyq ónimderin ósirý josparlanǵan. Bul Shymkenttegi qyzanaq pen qııar ósiretin eń úlken jylyjaı kesheni bolmaq, munda 2000-ǵa jýyq jańa jumys orny ashylady.
Qala ákimi Ǵabıt Syzdyqbekov KLO aýmaǵynda júzege asyrylatyn basqa da jobalar týraly málimdedi. Serik Jumanǵarın iske asyrylyp jatqan jobalardyń keleshegin joǵary baǵalap, memleket tarapynan barlyq qajetti qoldaý kórsetiletinin, óıtkeni, jobalar AÓK salasyndaǵy memlekettik saıasattyń maqsaty – aýyl sharýashylyǵy ónimderin tereń óńdeýdi 70%-ǵa deıin jetkizýge múmkindik beretinin atap ótti.
Vıtse-premer «AZALA Textile» JShS daıyn toqyma ónimderin óńdeý jáne shyǵarý boıynsha Qazaqstandaǵy iri ári jalǵyz tolyq tsıkldi toqyma fabrıkasyna bardy. Onda 475 adam jumys isteıdi. Biregeı toqyma kombınaty ıirilgen jipten toqyma buıymdaryna deıin birneshe ondaǵan ónim túrin shyǵarady. Kásiporynnyń qýattylyǵy jylyna 6 800 tonnadan astam ıirilgen jip pen 14 mln syzyqtyq metr óńdelmegen mata shyǵarýǵa jetedi. Bul eksportqa baǵyttalǵan kásiporyn, AZALA Textile óz ónimderiniń shamamen 70%-yn taıaý shet elderge, Lıtvaǵa, Germanııaǵa, Italııaǵa, Polshaǵa, Belgııaǵa, Danııaǵa, Latvııaǵa jáne Túrkııaǵa tasymaldaıdy.
Óndiristik tsehtardy aralaý jáne zaýyt basshylyǵymen áńgimelesý qorytyndysy boıynsha Serik Jumanǵarın memleket muqtajdyqtary úshin otandyq toqyma óndirýshisiniń ónimin satyp alýdy arttyrý múmkindigin pysyqtaýdy tapsyrdy.
