Shymkentte jańa Opera jáne balet teatrynyń qurylysy nege bastalmaı tur
ShYMKENT. KAZINFORM — Shymkentte jańa óner ordasynyń qurylysy jobalaý-smetalyq qujattama saraptamadan ótkennen keıin qolǵa alynbaq.
Osydan tórt jyl buryn Memleket basshysy Shymkentte jańa Opera jáne balet teatryn salýdy tapsyrǵan bolatyn.
Qaladaǵy qazirgi Opera jáne balet teatrynyń ǵımaraty 1984 jyly salynǵan. 330 oryndyq nysannyń paıdalanýǵa berilgenine 40 jyldan astam ýaqyt ótti. Búginde qoldanystaǵy ǵımarat talaptarǵa saı emes.
Qala ákiminiń orynbasary Sársen Quranbek jańa teatr qurylysynyń ne sebepti kesheýildep jatqanyn túsindirdi.
Onyń aıtýynsha, jobany iske asyrý barysynda birqatar másele týyndaǵan.
— Shymkentte jańadan salynatyn Opera jáne balet teatrynyń qurylysyn «Qazaq Stroy» kompanııasy taǵy da kidirtip otyr. Buǵan qosa, sheshimin kútken birqatar rásimdik másele bar. Jobalaý-smetalyq qujattamasy ázirlenip, saraptamaǵa engizildi. Qazir qujattama saraptamada qaralyp jatyr. Onyń qorytyndysy shyqqannan keıin qurylys jumystary bastalady, — dedi qala ákiminiń orynbasary.
Buǵan deıin Shymkent qalasynda jańa Opera jáne balet teatryn salý úshin ákimdik jalpy aýmaǵy 2,8 gektar jer ýchaskesin belgilegenin habarlaǵan edik. Jobaǵa sáıkes teatrdyń kórermen zaly 1500 orynǵa eseptelgen.
