Shymkentte jańa emhana, aýrýhana korpýsy jáne 50 shaqyrymdyq aınalma jol salynady
ShYMKENT. KAZINFORM – Shymkentte birden úsh iri áleýmettik jáne ınfraqurylymdyq jobanyń qurylysy bastaldy.
Qalada aýysymyna 500 adam qabyldaıtyn jańa emhana men №2 qalalyq kópbeıindi aýrýhananyń 80 tósek-orynǵa arnalǵan qosymsha korpýsynyń qurylys alańdarynda kapsýla salý rásimi ótti. Sonymen qatar uzyndyǵy 50 shaqyrym bolatyn aınalma avtomobıl jolynyń qurylysyna start berildi.
Atalǵan jobalar Memleket basshysynyń tapsyrmasyna sáıkes júzege asyrylyp jatyr. Olar qala halqynyń ósýine baılanysty áleýmettik jáne kólik ınfraqurylymyna artqan qajettilikti qamtamasyz etýge baǵyttalǵan.
«Shymkent City» shaǵynaýdanynda salynatyn jańa emhana bir aýysymda 500 adam qabyldap, 30 myńnan astam turǵynǵa qyzmet kórsetedi. Munda eresekter jáne balalar bólimderi, áıelder konsýltatsııasy, otbasylyq densaýlyq ortalyǵy, klınıkalyq-dıagnostıkalyq zerthana, KT jáne MRT, endoskopııa jáne rentgenodıagnostıka kabınetteri ornalasady.
Sondaı-aq 20 oryndyq kúndizgi statsıonar, ambýlatorııalyq hırýrgııa ortalyǵy men ońaltý bólimi qarastyrylǵan. Balalar bólimsheleri jeke lıftteri men kútý aımaqtary bar bir qabatqa ornalastyrylady. Bes jasqa deıingi balalarǵa kútim jasaý jáne patronaj qyzmeti uıymdastyrylyp, júkti jáne bosanǵannan keıingi áıelderdiń densaýlyǵy baqylaýǵa alynady.
№2 qalalyq kópbeıindi aýrýhananyń qosymsha korpýsy 80 tósek-orynǵa eseptelgen. Aýrýhana jyl saıyn shamamen 20 myń naýqasty qabyldap, neırohırýrgııa, kardıologııa, ınsýlttik kómek, reanımatsııa jáne perınataldyq medıtsına baǵyttary boıynsha qyzmet kórsetedi.
Jańa ǵımaratta neırohırýrgııa jáne kardıoreanımatsııa baǵyttary damytylyp, ınsýlt, ınfarkt jáne jedel koronarlyq sındromǵa shaldyqqan naýqastarǵa kómek kórsetý múmkindigi keńeıedi. Jańa korpýs qoldanystaǵy statsıonarlyq jáne perzenthana korpýstarymen jabyq galereıa arqyly jalǵasyp, biryńǵaı medıtsınalyq klaster qurylady.
– Prezıdenttiń tapsyrmasyna sáıkes Shymkenttiń jaıly ómir súrýine jáne odan ári damýyna qajetti ınfraqurylymdy kezeń-kezeńimen damytyp kelemiz. Jańa medıtsınalyq nysandar turǵyndarǵa medıtsınalyq kómek kórsetý múmkindigin keńeıtse, aınalma jol tranzıttik kólikti qala aýmaǵynan tys baǵyttap, jol jelisine túsetin júktemeni azaıtýǵa múmkindik beredi, – dedi qala ákimi Ǵabıt Syzdyqbekov.
Uzyndyǵy 50 shaqyrym bolatyn jańa aınalma jol tórt jolaqty bolady. Magıstral Almaty–Termez avtomobıl joly arqyly Almaty baǵytynan Shymkentke kireberisti Soltústik aınalma jolmen jáne Tashkent baǵytyna shyǵatyn jolmen baılanystyrady.
Joba halyqaralyq jáne respýblıkalyq tranzıttik kólikterdi qala aýmaǵynan tys baǵyttaýǵa múmkindik beredi. Sonyń nátıjesinde negizgi kóshelerdegi júktemeni azaıtyp, qala ishindegi júk kólikteriniń qozǵalysyn qysqartý kózdelip otyr.
Joba ıntellektýaldy kólik júıeleri men qajetti ınjenerlik ınfraqurylymdy qamtıdy. Qurylys kezinde 500-den astam jumys orny ashylady. Jol paıdalanýǵa berilgennen keıin ony kútip-ustaýǵa shamamen 100 maman tartylady.
Aıta keteıik, buǵan deıin 2030 jylǵa deıin júzege asyrylatyn iri avtojol jobalarynyń qatarynda Shymkent qalasynyń aınalma jolyn salý kózdelgeni habarlanǵan bolatyn.
