Shymkentte jalǵan órt sóndirýshi hostel meńgerýshisin aldap soqqan

ShYMKENT. KAZINFORM — Shymkent qalasynda hostel meńgerýshisine ózin órt sóndirýshi retinde tanystyryp, qońyraý shalǵan alaıaq aqsha jymqyrǵany úshin isti boldy. 

Alaıaqty jedel izdestirý is-sharalary nátıjesinde qalalyq Polıtsııa departamentiniń kıberpolıtseıleri quryqtady. Ustalǵan azamat Shý qalasynyń 27 jastaǵy turǵyny bolyp shyqty.

Tergeý barysynda ol buryn-sońdy osy qonaq úıge birneshe ret toqtalyp, meńgerýshiniń jeke nómirin bilip alǵany anyqtaldy.

«Keıin, oǵan habarlasyp, ózin órt sóndirý qyzmetkeri retinde tanystyrady. Qaskóı hostel ǵımaraty qaýipsizdik talaptaryna tolyq saı kelmeıtinin jáne tıisti sertıfıkattyń merzimin 58 myń teńgege uzarta alatynyn jetkizgen. Sengish azamat birden qajet somany aıtylǵan shotqa aýdarǵan» — delingen habarlamada.

Ýaqyt óte, alaıaqtyń arbaýyna túskenin bilgen jábirlenýshi polıtsııaǵa jaıt týraly habarlaǵan.

Qazirgi tańda qylmystyq is aıyptaý aktisimen sotqa joldandy.