Shymkentte jalǵan lımonad satqan turǵyn ustaldy

ShYMKENT. KAZINFORM — Shymkentte ónimderdiń zańsyz aınalymyn aýyzdyqtaýǵa baǵyttalǵan ádilet pen quqyq qorǵaý organdary qyzmetkerleriniń birlesken tekserýi barysynda belgili grýzın brendimen jasalǵan kontrafaktilik sýsyndardyń partııasy tárkilendi.

Ádilet departamentiniń málimetinshe, qaladaǵy dúkennen «Natahtarı» saýda belgisimen satylǵan 140 dana gazdalǵan sýsyn anyqtalǵan. Tekserý nátıjesinde lımonadtardyń resmı óndirýshi shyǵarmaǵany anyqtalyp, sýsyn «qaýipti» dep tanyldy.

Qalalyq ádilet departamentiniń basshysy Muhtar Ábdezovtiń aıtýynsha, avtorlyq quqyq ıesi tárkilengen sýsyndardyń jalǵan ekenin rastaǵan.

— Avtorlyq quqyq ıelenýshiniń resmı málimdemesine sáıkes, tárkilengen ónimder kontrafaktilik, túpnusqalyq kompanııada jasalmaǵan jáne tutynýshylardyń densaýlyǵy men ómirine qaýip tóndiredi. Tergeý nátıjesinde azamat «R» QR ÁQBtK-niń 158-babymen kináli dep tanyldy, — dedi Muhtar Ábdezov.

Sot oǵan 82 572 teńge aıyppul saldy. Sonymen qatar sot qaýlysyna sáıkes 84 000 teńgeniń kontrafaktilik ónimderi tárkilenip, joıyldy.

— Bul jumys bizdiń kóleńkeli naryqqa qarsy júrgizilip jatqan kúresimizdiń jáne avtorlyq quqyq ıelerin sapasyz jáne qaýipti ónimderden qorǵaýdyń bir bóligi. Ádilet departamenti zııatkerlik menshik zańnamasyn buzǵandarǵa qatysty qatań sharalardy jalǵastyrady, — dep atap ótti departamentte.

Mamandar turǵyndardy qyraǵy bolýǵa, ónimdi tek senimdi satýshylardan satyp alýǵa, al satýshylardan taýardyń sapasy men shyqqanyn rastaıtyn qujattardy talap etýge shaqyrady.

Aıta keteıik, elimizde jalǵan veterınarlyq qujat jasaǵandarǵa qylmystyq jaýapkershilik engizilmek.