Shymkentte jaldamaly páterden bir otbasynyń úsh adamy óli kúıinde tabyldy

ShYMKENT. KAZINFORM – Aldyn ala málimet ólimniń sebebi kómirqyshqyl gazymen ýlaný ekenin kórsetip otyr. Oqıǵa saldarynan anasy, onyń uly jáne ájesi kóz jumǵan. Otbasy jaldamaly páterde turǵan.

Qaıǵyly jaǵdaıdy alǵash kórshileri baıqaǵan. Úı turǵyndary páter ıelerine habarlasýǵa birneshe ret tyrysqanymen, eshkim jaýap bermegen. Osydan keıin olar qutqarý qyzmetin shaqyrǵan.

Shymkent qalalyq Tótenshe jaǵdaılar departamentiniń málimetinshe, «112» pýltine habarlama 8 aqpan kúni saǵat 16:36-da túsken.

– «Kúnshyǵys» shaǵynaýdanynda páter ıeleri uzaq ýaqyt boıy esik ashpaı jatqany týraly habar tústi. Oqıǵa ornyna jedel-qutqarý jasaǵy jiberildi, – dep naqtylady qalalyq TJD ókilderi.

Belgili bolǵandaı, páterden úsh adamnyń máıiti tabylǵan. Aldyn ala aqparatqa sáıkes, qaıǵyly jaǵdaı kómirqyshqyl gazynan ýlanýdan bolǵan.

Qazirgi ýaqytta oqıǵanyń mán-jaıyn anyqtaý úshin tıisti qyzmet ókilderi jumys júrgizip jatyr.

Buǵan deıin Túrkistan oblysynda ýaqytsha salynǵan turǵyn úıde peshtiń aqaýy saldarynan eki jaldamaly jumysshy kómirqyshqyl gazynan ýlanǵany habarlanǵan bolatyn. Er adam oqıǵa ornynda kóz jumyp, onyń jubaıy aýrýhanaǵa jetkizilgen.