Shymkentte zańsyz tas óndirgender Badam ózeni boıyndaǵy jańa beton dambany búldirdi
ShYMKENT. KAZINFORM — Badam ózeni boıyndaǵy jaǵalaýdy bekitý jumystary aıaqtalǵanyna birneshe aı ótpeı jatyp, jańa beton dambanyń shamamen 40 metri qırap qaldy. Quqyq qorǵaý organdary gıdrotehnıkalyq nysanǵa keltirilgen zalalǵa qatysy bar tulǵalardy anyqtap jatyr. Al merdiger kompanııa nysandy kepildik mindetteme aıasynda qalpyna keltirýi tıis.
Joba ótken jyldyń jeltoqsan aıynda aıaqtalǵan. Shymkent qalasyndaǵy Badam ózeni boıynda 5,3 shaqyrym jaǵalaý syzyǵy bekitilgen. Igilik, Jańatalap jáne Kókbulaq turǵyn alaptary mańynda mamandar ózen arnasyn tegistep, betkeılerin betonmen nyǵaıtyp, gıdrotehnıkalyq qurylymdardy kúsheıtken.
Atalǵan jumystarǵa bıýdjetten 2,7 mlrd teńge bólindi. Jańartylǵan damba kóktemgi sý tasqyny kezinde sý deńgeıi kóterilgen jaǵdaıda jaqyn mańdaǵy aýmaqtarda sý basý qaýpin azaıtady dep josparlanǵan.
Alaıda bekitilgen jaǵalaýdyń bir bóligi búlindi. Qalalyq jaıly ortany damytý basqarmasynyń málimetinshe, belgisiz tulǵalar ózen arnasynan zańsyz tas óndirgen. Saldarynan beton konstrýktsııa zaqymdanǵan.
— Zańsyz áreketter saldarynan beton dambanyń shamamen 40 metri búlindi. Qazirgi ýaqytta quqyq qorǵaý organdary kinálilerdi anyqtap jatyr, — dedi basqarma basshysy Ábilqaıyr Ońǵar.
Vedomstvonyń habarlaýynsha, ózendegi jaǵdaı turaqty, sý basý qaýpi joq.
Zaqymdanǵan aýmaqty merdiger uıym óz qarajaty esebinen qalpyna keltiredi. Jobaǵa 7 jyldyq kepildik merzimi qarastyrylǵan.
Badam ózeninde zańsyz ken óndirý máselesi buǵan deıin de kóterilgen. Budan buryn qum-qıyrshyq tas qospasy jetkizilgen jer ýchaskesi jeke kásipkerge tıesili jáne oǵan jerge memlekettik akt berilgeni habarlanǵan. Alaıda qujattarda paıdaly qazbalardy óndirýge emes, balyq sharýashylyǵyn júrgizýge ǵana ruqsat berilgeni kórsetilgen.
Sonymen qatar, ózen arnasy boıyndaǵy qurylystyń tyǵyz ornalasýy da jaǵdaıdy kúrdelendirip otyr. Sý qorǵaý aımaqtarynyń shekarasy jyldar boıy naqty belgilenbegendikten, jer ıeleri nysandardy kelisimsiz turǵyzǵan. Resmı derekterge sáıkes, jaǵalaý aımaǵynda talaptardy buza otyryp salynǵan 2 378 nysan anyqtalǵan.