Shymkentte zańsyz satylǵan 615 quty kontrafaktilik motor maıy tárkilendi
ASTANA. KAZINFORM — Shymkentte «Toyota» jáne «Lexus» taýar belgileri bar kontrafaktilik motor maıyn zańsyz satýdyń joly kesildi, dep habarlaıdy Shymkent qalasynyń Ádilet departamentiniń baspasóz qyzmeti.
Vedomstvo «Toyota» jáne «Lexus» taýar belgileri quqyq ıelenýshileriniń resmı ókiliniń ótinishi negizinde motor maıyn aýystyrý pýnktteriniń birinde jospardan tys tekserý júrgizdi.
Tekserý barysynda atalǵan taýar belgilerin zańsyz paıdalaný faktisi anyqtaldy. Atap aıtqanda, kontrafaktilik ónimdi saqtaý, satýǵa usyný jáne ótkizý faktileri belgilendi.
— Baqylaý is-sharalarynyń nátıjesinde zańsyz aınalymnan quqyq ıelenýshilerdiń taýar belgileri zańsyz qoldanylǵan kontrafaktilik motor maıynyń 615 qutysy tárkilendi. Quqyq buzýshyǵa qatysty ákimshilik quqyq buzýshylyq týraly hattama toltyrylyp, is materıaldary qaraý jáne protsestik sheshim qabyldaý úshin sotqa joldandy, — delingen habarlamada.
Departament atap ótkendeı, zııatkerlik menshik quqyqtaryn qorǵaý jáne kontrafaktilik ónimniń zańsyz aınalymyna tosqaýyl qoıý ádilet organdarynyń turaqty baqylaýynda.
Osyǵan deıin Qazaqstanda 1,6 mln-nan astam motor maıy tsıfrlyq tańbalaýdan ótkeni belgili boldy.
