Shymkentte zańsyz onlaın-kazıno uıymdastyrǵan eki adam sottaldy
ShYMKENT. KAZINFORM – Shymkentte «Bingo-37» jáne «Lotoboom» platformalary arqyly zańsyz oıyn bıznesin uıymdastyrǵan eki adam tórt jylǵa bas bostandyǵynan aıyryldy. Eki onlaın-kazınonyń jalpy aqsha aınalymy 3,1 mlrd teńgege jetken, dep habarlaıdy Qarjylyq monıtorıng agenttigi.
Agenttiktiń Shymkent qalasy boıynsha departamenti zańsyz oıyn bıznesin uıymdastyrý deregi boıynsha tergeýdi aıaqtady.
Tergeý málimetinshe, uıymdastyrýshylar WhatsApp messendjeri arqyly azamattarǵa qumar oıyndarǵa qatysý týraly usynystar jibergen. Qyzyǵýshylyq tanytqan adamdarǵa arnaıy akkaýnt ashylyp, logın men qupııasóz berilgen. Sondaı-aq aqsha aýdarý úshin bank shottarynyń derektemeleri joldanǵan.
Zańsyz oıyn bıznesinen túsken aqshany qabyldaý jáne utystardy tóleý úshin 14 dropperdiń atyna ashylǵan bank shottary paıdalanylǵan.
Eki onlaın-kazınonyń jalpy aqsha aınalymy 3,1 mlrd teńgeni quraǵan.
– Qylmystyq jolmen alynǵan kiriske uıymdastyrýshylar 200 mln teńgeden astam somaǵa múlik satyp alǵan. Onyń ishinde BYD Destroyer, LiXiang L6 Max, Chevrolet Monza, SsangYong Rexton markaly avtokólikter, sondaı-aq eki jer ýchaskesi bar, – delingen agenttik habarlamasynda.
Sot úkimimen eki adam tórt jylǵa bas bostandyǵynan aıyryldy. Qylmystyq jolmen alynǵan qarajatqa satyp alynǵan atalǵan múlik memleket kirisine tárkilendi.
Agenttik sot úkimi ázirge zańdy kúshine enbegenin atap ótti.
Aıta keteıik, buǵan deıin Shymkent turǵynynyń zańsyz onlaın-kazıno uıymdastyrǵany úshin tórt jylǵa bas bostandyǵynan aıyrylyp, memleket paıdasyna 2,8 mlrd teńge zańsyz kiris óndirilgeni habarlanǵan.
