Shymkentte zańsyz berilgen 52 jer ýchaskesi anyqtaldy
ShYMKENT. KAZINFORM — Shymkentte zańsyz berilgen jer telimderin memleket menshigine qaıtarý jumystary jalǵasyp jatyr.
Qalalyq jer qatynastary basqarmasynyń basshysy Azat Islamovtyń aıtýynsha, bıyl Shymkentte zańsyz berilgen 52 jer ýchaskesi anyqtalǵan.
— Atalǵan ýchaskeler boıynsha tıisti sharalar qabyldaý úshin ýákiletti organdarǵa hat joldandy. Qazirgi tańda tekserý júrgizilip jatyr. Ótken jyly Shymkentte naryqtyq quny 800 mln teńge bolatyn 150 gektar jerdiń zańsyz berilgeni anyqtalyp, sot sheshimimen memleket menshigine qaıtaryldy, — dedi ol.
Sonymen qatar bıyl memleket muqtajy úshin alynýy tıis 75 jer ýchaskesi boıynsha jumystar qolǵa alynǵan. Búginge deıin jalpy aýdany 7,2 gektardy quraıtyn 51 jer ýchaskesi boıynsha ótemaqy tólenip, 4 jer ýchaskesiniń ornyna teń baǵaly jer ýchaskesi berilgen.
Budan bólek qalada jer telimderin esepke alý, olardyń zańdylyǵyn baqylaý jáne tıimdi paıdalaný maqsatynda keshendi túgendeý jumystary jalǵasyp jatyr.
Basqarma basshysynyń aıtýynsha, elektrondy kartadaǵy málimetter men jer ýchaskeleriniń naqty ornalasýy arasynda sáıkessizdikter kezdesedi.
— Elektrondy kartada keıbir jer ýchaskeleri bir-birimen qabattasyp nemese yǵysyp ornalasqan. Keı jaǵdaılarda bul yǵysý 30-40 metrge deıin jetedi. Keıbir azamattardyń jer ýchaskesi bir oramda ornalasqanymen, elektrondy kartada basqa mekenjaı kórsetilgen. Osy máselelerdi sheshý, sondaı-aq jerdi zańsyz paıdalaný, nysanaly maqsatyna qaıshy nemese tıimsiz paıdalaný faktilerin anyqtaý úshin qala aýmaǵyndaǵy jerlerdi túgendeý jumystary júrgizilip jatyr, — dedi spıker.
Azat Islamov buǵan deıin qala aýmaǵyna aýdandar men oblys aýmaǵynan jerler qosylǵan kezde bir ýchaskege qatysty eki qaýly qabyldanǵan jaǵdaılar bolǵanyn atap ótti.
— Mundaı máseleler Jer kodeksiniń 167-babyna sáıkes tek sot tártibimen sheshiledi. Al eki bólek berilgen jer ýchaskeleri bir-birimen qabattasqan jaǵdaıda, olardyń naqty ornalasýyna qaraı azamattardyń máselesi qaralady, — dedi ol.
Sondaı-aq qala aýmaǵynda óz betinshe salynǵan turǵyn úılerge quqyq berý máselelerin qaraý úshin arnaıy jumys toby qurylyp, tıisti zerdeleý júrgizilgen. Nátıjesinde qujatsyz salynǵan 2314 turǵyn úıdiń qazirgi tańda 1400-i jumys toby tarapynan zerdelendi. Budan bólek shaharda qaýipsizdik talaptaryna saı kelmeıtin jáne turýǵa jaramsyz 187 qurylys nysany buzyldy.
Aıta keteıik, jyldyń alǵashqy alty aıynda basqarmaǵa 2140 aryz-shaǵym túsken. Sonymen qatar 11 memlekettik qyzmet túri boıynsha 22 myńnan astam ótinish qaralǵan.
Buǵan deıin Shymkentte 2300-den astam turǵyn úıdiń qujatsyz salynǵany týraly habarlaǵan edik.
