Shymkentte zańsyz ákelingen 11 myńnan astam jumyrtqa joıyldy
ShYMKENT. KAZINFORM – Shymkentte Reseıden zańsyz ákelingen taýyq jumyrtqalarynyń iri partııasyn satý áreketi anyqtalyp, ónim tolyqtaı joıyldy.
Zań buzýshylyq QR Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti, Shymkent qalasynyń Saýda jáne tutynýshylardyń quqyqtaryn qorǵaý departamenti jáne Qazaqstan qus ósirýshiler odaǵynyń birlesken baqylaý sharalary barysynda belgili boldy.
Mamandar «Jibek joly» bazarynda mindetti tańbalaýy joq jáne veterınarııalyq ilespe qujattarsyz satylymǵa shyǵarylǵan jumyrtqalardy anyqtaǵan.
– Baqylaý-qadaǵalaý is-sharalary barysynda jalpy sany 11 850 dana jumyrtqa tárkilendi. Zerthanalyq saraptama nátıjesinde ónimniń qaýipsizdik talaptary men qoldanystaǵy zańnama talaptaryna sáıkes kelmeıtini anyqtaldy, – delingen habarlamada.
Osyǵan baılanysty tárkilengen ónimniń barlyq partııasy arnaıy komıssııanyń qatysýymen belgilengen tártipke sáıkes joıyldy.
Zań buzýshylyqqa qatysy bar tulǵalarǵa qatysty ákimshilik is qozǵalyp, materıaldar ýákiletti memlekettik organdarǵa joldandy.
Mamandardyń aıtýynsha, qoldanystaǵy shekteýlerge qaramastan elimizdiń birqatar óńirlerinde Reseıden ákelingen tańbalanbaǵan jumyrtqalardy ótkizý faktileri áli de kezdesedi. Osyǵan baılanysty respýblıka aýmaǵyndaǵy bazarlar men saýda oryndarynda baqylaý sharalary jalǵasyp jatyr.
– 2026 jylǵy 17 sáýirden bastap Qazaqstan aýmaǵyna taǵamdyq taýyq jumyrtqalaryn ákelýge ýaqytsha tyıym salyndy. Bul shara kóleńkeli ımporttyń jolyn kesýge, dempıngtik saýdanyń aldyn alýǵa jáne ishki naryqtaǵy baǵa turaqtylyǵyn saqtaýǵa baǵyttalǵan, – dep atap ótti sala mamandary.
Qazaqstan qus ósirýshiler odaǵy jumyrtqa ónimderiniń zańsyz aınalymyn anyqtaý jáne onyń jolyn kesý boıynsha memlekettik organdarmen birlesken jumysty jalǵastyryp jatqanyn málimdedi.
Aıta keteıik, Shymkentte 100-den astam zańsyz qurylys nysany anyqtaldy.
