Shymkentte úı tazalaýshy áıeldi óltirgen jasóspirimniń jazasy uzartyldy

ShYMKENT. KAZINFORM — Shymkent qalalyq soty úı tazalaýǵa kelgen áıeldi óltirip, denesin qoqys jáshiginiń janyna tastaǵan jasóspirimge qatysty úkimdi ózgertti.

Buǵan deıin birinshi satydaǵy sot úkimimen 17 jastaǵy jasóspirim adam óltirgeni jáne urlyq jasaǵany úshin kináli dep tanylyp, 7 jyl 6 aıǵa bas bostandyǵynan aıyrý jazasyna sottalǵan. Al máıitti qorlaý boıynsha kinási dáleldenbeýine baılanysty aqtalǵan. 

Іs sot alqasyna prokýrordyń apellıatsııalyq ótinishhaty boıynsha túsken. Prokýror QK-niń 188-baby 1-bóligimen (urlyq) taǵaıyndalǵan jazany 1 jylǵa deıin tómendetýdi suraǵan.

l jábirlenýshi tarap óz shaǵymynda sottalǵandy asa qatygezdikpen jasalǵan adam óltirý jáne máıitti qorlaý derekteri boıynsha jazany qatańdatýdy ári azamattyq talaptardy tolyq kólemde qanaǵattandyrýdy ótingen.

Apellıatsııalyq alqa isti zerdeleı kele, máıitti qorlaý baby boıynsha kinásiz dep taný týraly sheshimdi ózgerissiz qaldyrdy.

— Sot alqasy kámelet jasyna tolmaǵan A.-ǵa QK-niń 188-babynyń 1-bóligimen (urlyq) jaza qate taǵaıyndalǵanyn eskerip, atalǵan jazany zań talaptaryna sáıkestendirip, oǵan 1 jylǵa bas bostandyǵynan shekteý jazasyn belgilendi. Sonymen qatar jazany ulǵaıtyp, túpkilikti 8 jyl 6 aıǵa bas bostandyǵynan aıyrý jazasyn taǵaıyndady, — delingen sottyń habarlamasynda.

Sondaı-aq jábirlenýshilerdiń paıdasyna óndiriletin moraldyq zııan kólemi 10 mln teńgeden 20 mln teńgege deıin ulǵaıtyldy.

Sot aktisi zańdy kúshine endi.

Budan buryn Aqtóbede oqýshy qyzdy zorlap, júkti qylǵan ógeı atasy sottalǵanyn jazǵan edik.