Shymkentte ústine aǵash qulaǵan 10 jastaǵy balanyń ólimi: qylmystyq is qozǵaldy
ShYMKENT. KAZINFORM – Shymkent qalasynda kópqabatty turǵyn úıdiń aýlasynda bolǵan qaıǵyly oqıǵaǵa baılanysty qylmystyq is qozǵaldy.
Polıtsııaǵa 11 aqpanda aýlada aǵash qulap, balanyń zardap shekkeni týraly habarlama túsken. Oqıǵa ornyna jetken polıtsııa qyzmetkerleri aǵashtyń 10 jastaǵy balanyń ústine qulaǵanyn anyqtady. Ókinishke qaraı, oqıǵa ornynda jasóspirim kóz jumdy.
– Adam ólimine ákelip soqtyrǵan qyzmettik mindetterge salǵyrt qaraý deregi boıynsha qylmystyq is qozǵaldy, – dep habarlady Shymkent qalalyq Polıtsııa departamenti.
Aldyn ala málimetterge sáıkes, oıyn barysynda kámeletke tolmaǵan bala qar qalyń túskennen keıin butaqtarynda kóp mólsherde qar jınalǵan aǵashtyń butaqtaryn ózine qaraı tartqan. Sonyń saldarynan qar syrǵyp túsip, keıin aǵash qulaǵan.
Qazirgi ýaqytta oqıǵanyń mán-jaıyn jan-jaqty, tolyq jáne obektıvti anyqtaýǵa baǵyttalǵan tergeý sharalary júrgizilip jatyr. Qala ákimdiginde qyzmettik tekseris júrgizý úshin arnaıy komıssııa quryldy.
– Qaza bolǵan balanyń týǵan-týystary men jaqyndaryna qaıǵyryp kóńil aıtamyz. Otbasyna qajetti jan-jaqty kómek pen qoldaý kórsetiledi, – delingen vedomstvo habarlamasynda.
Shymkent qalalyq Tótenshe jaǵdaılar departamentiniń málimetinshe, qaıǵyly oqıǵa bolǵan kúni sınoptıkter qatty jaýyn-shashyn, kóktaıǵaq, boran, tuman jáne jeldiń kúsheıýi týraly eskertý jasaǵan.
– «112» qyzmetine túsken habarlamalar negizinde jedel-qutqarý jasaǵy aǵashtardyń qulaýyna baılanysty avarııalyq-qutqarý jumystaryna 11 ret shyqqan. Oqıǵa saldaryn joıýǵa 41 qyzmetker men 11 tehnıka jumyldyryldy, – dep málimdedi TJD.
Qutqarýshylar turǵyndardy qolaısyz aýa raıy kezinde qaýipsizdik sharalaryn saqtaýǵa, aǵashtar men elektr jelileriniń astynda turmaýǵa, jol qozǵalysy kezinde muqııat bolýǵa jáne múmkindiginshe alys saparlarǵa shyqpaýǵa shaqyrdy.
Budan buryn habarlaǵandaı, Shymkentte tolassyz jaýyn-shashynnan keıin kóshelerdi qar men sý basty. Kommýnaldyq qyzmetter kúsheıtilgen rejımge kóshirildi. Alaıda qaıǵyly jaǵdaı tirkeldi, aǵash qulap, saldarynan bir oqýshy qaza tapty.