Shymkentte úshinshi júrek transplantatsııasy sátti jasaldy

ASTANA. KAZINFORM - Donorlyq júrek Taraz qalasynan jedel túrde, 1,5 saǵattan aspaıtyn ýaqytta jetkizildi. Retsıpıent – 41 jastaǵy Shymkent qalasynyń turǵyny, pedagog mamandyǵy boıynsha eńbek etedi. Ol 2012 jyldan beri júrek jetkiliksizdiginiń aýyr túrimen aýyryp kelgen.

Donorlyq organdy alý, ony tasymaldaý jáne júrekti aýystyrý operatsııasy barlyq medıtsınalyq ári etıkalyq talaptarǵa tolyqtaı saı júrgizildi. 

Kúrdeli ota Shymkent qalalyq densaýlyq saqtaý basqarmasynyń uıymdastyrýymen, joǵary sanatty dáriger-kardıohırýrg Darhan Súıgenbaevtyń jetekshiligimen jáne Taraz qalasyndaǵy áriptesterdiń, UMC komandasynyń, sondaı-aq tartylǵan barlyq qyzmetterdiń kásibı ári úılesimdi jumysynyń nátıjesinde sátti aıaqtaldy

Bul oqıǵa — Qazaqstandaǵy transplantologııa salasynyń damýy jolyndaǵy mańyzdy kezeń bolyp tabylady. Sonymen qatar, óńirler arasyndaǵy tıimdi yntymaqtastyqtyń jarqyn úlgisi retinde baǵalandy.

Aıta keteıik, máıitten alynǵan júrek transplantatsııasy Shymkentte úshinshi ret jasalyp otyr. Buǵan deıin Júrek ortalyǵynyń bilikti dárigerler komandasy eki ret aǵza almastyrý otasyn sátti ótkizip, qos naýqasqa jańa ómir syılaǵan bolatyn.

Pavlodarda 11 myńǵa jýyq adam júrek jetkiliksizdigimen esepte tur.