Shymkentte úshaýysymdy oqytý máselesi sheshilgen
ASTANA. KAZINFORM - Jańa oqý jyly qarsańynda Oqý-aǵartý mınıstri Ǵanı Beısembaev Shymkenttegi birqatar bilim berý uıymdaryna bardy. Ol balalardyń qaýipsizdigi, mektepterdi pedagogtermen qamtamasyz etý, tamaqtanýdy uıymdastyrý jáne zamanaýı ınfraqurylymdy damytý máselelerine basa nazar aýdardy.
Bul týraly QR Oqý-aǵartý mınıstrliginiń baspasóz qyzmeti habarlady.
Búginde qala mektepteriniń qaýipsizdigi jańa deńgeıge kóterildi. Barlyq mekemeler beınebaqylaý júıelerimen jabdyqtalǵan jáne ІІM Jedel basqarý ortalyqtaryna qosylǵan. Beınejazba ákimdiktiń Ahýaldyq ortalyǵyna da taratylady, bul jaǵdaıdy naqty ýaqyt rejıminde baqylaýǵa jáne yqtımal syn-tegeýrinderge jedel den qoıýǵa múmkindik beredi.
Mektep ınfraqurylymynda da úlken ózgerister oryn alýda. Memleket basshysynyń bastamasymen iske asyrylyp jatqan «Keleshek mektebi» ulttyq jobasy aıasynda Shymkentte 12 jańa mektep salyndy. Solardyń biri – 2030 oqýshy bilim alatyn №144 mektepke mınıstr arnaıy bardy.
Mınıstrdiń aıtýynsha, jańa mektepterdiń qurylysy tyǵyz ornalasqan shaǵyn aýdandardaǵy júktemeni azaıtyp, árbir balaǵa jaıly jaǵdaı jasaýǵa septigin tıgizedi. Qala ákimi qazirgi tańda úshaýysymdy oqytý máselesi tolyǵymen sheshilgenin aıtty.
Mektepterdi jańǵyrtý jumystary renovatsııa baǵdarlamasy aıasynda da jalǵasýda. Shymkentte bul jumystar 11 bilim berý uıymyn qamtyp otyr. Solardyń biri – Saıram turǵyn alabyndaǵy №109 mektep. Munda jaqynda kúrdeli jóndeý jumystary aıaqtalyp, mektep zamanaýı jáne qaýipsiz standarttarǵa saı jaǵdaıǵa keltirildi.
Bilim berý júıesin damytý bilikti kadrlarsyz múmkin emes. Pedagogtermen kezdesý barysynda mınıstr qazirgi mektep tek oqýshylar úshin jaıly ári qaýipsiz orta ǵana emes, sonymen qatar muǵalimder úshin de kásibı ósý ornyna aınalýy kerektigin atap ótti. Memleket pedagogterdi qoldaý jáne olardyń kásibı damýy úshin barlyq jaǵdaıdy jasap otyrǵanyn jetkizdi.
Sapar barysynda ınklıýzıvti bilim berý máselesine de erekshe kóńil bólindi. Saıram kómekshi mektep-ınternaty-kolledjinde mınıstr erekshe bilim berý qajettilikteri bar balalarǵa jasalǵan jaǵdaılarmen tanysty. Búginde Shymkent qalasynda ınklıýzıvti bilim berýmen qamtý kórsetkishi balabaqshalarda – 96%, al mektepterde – 95% qurap otyr. Ulttyq deńgeıde «Erekshe bilimdi qajet etetin balalardy keshendi qoldaý týraly» zań jobasy ázirlenýde.
Mınıstr jumys sapary aıasynda Shymkent agrarlyq-tehnıkalyq kolledjine de baryp, stýdentterge arnalǵan materıaldyq-tehnıkalyq baza men oqý jaǵdaılarymen tanysty. Kolledj óńir ekonomıkasy úshin asa qajet tehnıkalyq jáne jumysshy mamandyqtar boıynsha mamandar daıarlaýda.
Sonymen qatar, Ǵanı Beısembaev №2 Oqýshylar saraıynda oqýshylarmen jáne pedagogtermen kezdesip, memleket tarapynan qosymsha bilim berý salasyna júıeli qoldaý kórsetilip jatqanyn atap ótti. Sońǵy úsh jylda eldegi qosymsha bilim berý uıymdarynyń sany eki esege artsa, bıyldyń ózinde bul salaǵa 400 jańa uıym qosyldy. Budan bólek, Memleket basshysynyń tapsyrmasymen jańa oqý jylynan bastap Shymkenttegi Prezıdent rezıdentsııasy daryndy balalarǵa arnalǵan lager retinde jumys isteıtin bolady.
Búginde Shymkent qalasynda 1100-den astam bilim berý uıymy jumys isteıdi. Olardyń qatarynda 290 mektep bar. Bul mektepterde 271 myń oqýshy bilim alyp, 32 myń muǵalim eńbek etýde.
Aıta keteıik, elordada ótken ustazdardyń respýblıkalyq tamyz konferentsııasynda Memleket basshysy aýyl balasy men qala balasynyń bilim alý múmkindigi birdeı bolýy kerektigin aıtqan bolatyn.