Shymkentte úsh áıel balabaqshaǵa jumysqa ornalasý úshin alaıaqqa 12 mln teńge bergen

ShYMKENT. KAZINFORM- Shymkenttikterdi aldaǵan Túrkistan oblysynyń turǵyny qamaýǵa alyndy.

Eńbekshi aýdandyq polıtsııa basqarmasyna úsh turǵyn alaıaqtyqtyń qurbany bolǵanyn aıtyp, kómekke júgingen. Jábirlenýshilerdiń aıtýynsha, beıtanys áıel olardy balabaqshaǵa tárbıeshi etip jumysqa ornalastyrýǵa ýáde bergen. Bul qyzmeti úshin áıelderdiń árqaısysynan qomaqty aqsha alǵan. Jábirlenýshilerge kelgen shyǵyn kólemi - 12 mıllıon teńge. 

«Qabyldanǵan sharalardyń nátıjesinde jedel ýákilder kúdiktini anyqtap, ustady. Ol buryn osyǵan uqsas qylmysy úshin sottalǵan Túrkistan oblysynyń turǵyny bolyp shyqty. Qazirgi tańda, áıel qamaýda», - delingen Shymkent qalasy polıtsııa departamentiniń baspasóz qyzmeti taratqan aqparatta.