Qylmysqa jol ashqan áreketsizdigi úshin 2 myńnan astam laýazymdy tulǵa jaýapkershilikke tartyldy
ASTANA. KAZINFORM — Іshki ister mınıstrliginde tergeýshilerdiń usynýlary negizinde qylmystardyń jasalýyna yqpal etken áreketsizdigi úshin eki myńnan astam laýazymdy tulǵa tártiptik jaýapkershilikke tartyldy. Bul sharalar quqyq buzýshylyqtardyń aldyn alý, qoǵamdyq qaýipsizdikti kúsheıtý jáne jábirlenýshilerge keltirilgen zalaldy óteý maqsatynda júrgizilgen keshendi jumystyń bir bóligi bolyp otyr. Bul týraly Polisia.kz jazdy.
ІІM tergeý departamenti qylmystyq isterdi tergeý kezinde zańdy qamtamasyz etý, azamattardyń quqyqtaryn qorǵaý jáne jábirlenýshilerge keltirilgen zalaldy óteý baǵytyndaǵy júıeli jumysty jalǵastyryp otyr.
— Іshki ister mınıstrliginiń tergeý departamenti azamattardyń konstıtýtsııalyq quqyqtaryn qorǵaý, qylmystyq isterdi tergeý kezindegi zańdylyqty qamtamasyz etý, qylmystarmen keltirilgen zalaldy óteý, kinálilerdiń jaýapkershiliginiń bultartpastyǵyn qamtamasyz etý jáne quqyq buzýshylyqtardyń aldyn alý baǵytynda turaqty jumys júrgizýde. Búginde profılaktıkalyq jumystyń tıimdi tetikteriniń biri — Qylmystyq-protsestik kodekstiń 200-babynda kózdelgen usyný engizý ınstıtýty. Jyl basynan beri tergelip jatqan qylmystyq ister boıynsha memlekettik organdarǵa, mekemeler men uıymdarǵa 45 myńǵa jýyq usyný engizildi, — dedi ІІM tergeý departamentiniń bastyǵy Samat Aısov.
Olardy qaraý nátıjesimen qoǵamdyq qaýipsizdikti kúsheıtý boıynsha naqty sharalar qabyldandy: áleýmettik jaǵdaıy qolaısyz aýdandarda, saýda jáne oıyn-saýyq oryndarynda qosymsha eki myńǵa jýyq beınebaqylaý kameralary ornatyldy; jol-kólik oqıǵalary jıi bolatyn 155 qaýipti aımaqta ınfraqurylym jaqsartylyp, jaryqtandyrý júıeleri, baǵdarshamdar, jol belgileri men jol tańbalary ornatyldy; 56 nysanda qaýipsizdik sharalary kúsheıtilip, kúzet júıeleri jańartyldy; bilim berý uıymdarynda 60-tan astam profılaktıkalyq sharalar ótkizildi.
— Sonymen qatar qaıta qylmys jasaǵan shartty túrde sottalǵan segiz adam jazasyn óteý úshin bas bostandyǵynan aıyrý oryndaryna jiberildi. Zańsyz qyzmetpen aınalysqan tórt sýbektiniń jumysy toqtatylyp, 15 kafe men túngi klýbtyń jumys ýaqytyna shekteý qoıyldy. Naqty mysaldardyń biri — bıyl qańtar aıynda bolǵan buzaqylyq faktisi boıynsha júrgizilgen tergeý nátıjesinde Pavlodar qalasynda laýndj-barlardyń biriniń qyzmeti toqtatyldy. Qaraǵandy oblysynda Aqsý-Aıýly — Balqash avtojolynda oryn alǵan, kámeletke tolmaǵan balanyń qaza bolýyna ákep soqqan jolaýshylar avtobýsynyń órtený faktisi boıynsha tergeýshiniń usynýy negizinde jolaýshylar avtobýstaryna jappaı tekserý júrgizildi. Nátıjesinde 199 avtobýs júrgizýshileri men ıeleri ákimshilik jaýapkershilikke tartyldy, onyń 55-i salondardy tıisti ruqsatsyz jatyn oryndarǵa qaıta jabdyqtaǵany úshin jaýapqa tartyldy. Usynýlardy qaraý nátıjesimen qylmystardyń jasalýyna yqpal etken áreketsizdigine baılanysty eki myńnan astam laýazymdy tulǵa tártiptik jaýapkershilikke tartyldy, sondaı-aq olardy qaraý jóninde tıisti sharalar qabyldamaǵany úshin 500-den astam tulǵa ákimshilik jaýapkershilikke tartyldy, — dedi spıker.
Vedomstvo jábirlenýshilerge kelgen shyǵyndy óteý máselesine erekshe nazar aýdarýda. Búginde aıaqtalǵan qylmystyq istermen keltirilgen jalpy shyǵyn kólemi 72 mlrd teńgeden asty. Onyń 34 mlrd teńgesiniń ótelýi qamtamasyz etildi. Mysaly, Astana qalasynda ınternet-alaıaqtyq faktisi boıynsha 111 azamat zardap shegip, keltirilgen shyǵyn kólemi 140 mln teńgeden asty. Sotqa deıingi tergep-tekserý nátıjesimen jábirlenýshilerge kelgen shyǵyn tolyq kólemde óteldi. Shyǵynnyń ótelýin qamtamasyz etý maqsatynda jalpy quny 29 mlrd teńgeden asatyn múlikke tyıym salyndy. Atap aıtqanda, Almaty oblysynda alaıaqtyq faktisi boıynsha qozǵalǵan qylmystyq is aıasynda eki jaýapkershiligi shekteýli seriktestiktiń jalpy quny 7 mlrd teńgeden asatyn 28 jyljymaıtyn múlkine tyıym salyndy.
— Azamattardy áleýmettik qoldaý tetikteriniń biri — Zardap shekkenderge ótemaqy qory jumys isteıdi. Ótemaqy alý quqyǵy qylmystyń 124 quramy boıynsha kózdelgen. Tólem kólemi 30-dan 50 aılyq eseptik kórsetkishke deıin belgilengen. Qor jumysy bastalǵannan beri bes myńnan astam jábirlenýshige jalpy somasy 831 mln teńgeden astam tólem jasaldy, — dedi Samat Aısov.
Bolashaq tergeýshiler men anyqtaýshylardy daıarlaýǵa jáne kadrlyq áleýetti nyǵaıtýǵa erekshe kóńil bólinýde. Bul jumys vedomstvolyq bilim berý júıesi arqyly jáne azamattyq joǵary oqý oryndarynyń zań fakýltetterimen birlesip júrgizilýde. Jas mamandardy tartý jáne olardy erte kezeńnen kásibı baǵyttaý maqsatynda 2019 jyldan beri zań fakýlteti stýdentteri úshin dýaldy oqytý baǵdarlamasy iske asyrylyp keledi. Búginde joǵary oqý oryndarymen 40 yntymaqtastyq týraly memorandýmǵa qol qoıyldy, 1524 stýdentti biriktiretin 47 stýdenttik klýb jumys isteıdi. 100-den astam túlek dıplom alǵannan keıin ishki ister organdaryna jumysqa ornalasýdy josparlap otyr.
— Kórip otyrǵanymyzdaı, atqarylyp jatqan jumys aýqymdy baǵyttardy qamtıdy. Ol quqyq buzýshylyqtardyń aldyn alý, zardap shekkenderdiń shyǵynyn óteý jáne ishki ister organdary úshin bolashaq mamandardy daıarlaý jumystaryn qamtıdy. Qabyldanyp jatqan sharalar profılaktıkalyq jumystyń tıimdiligin arttyryp qana qoımaı, azamattar úshin qaýipsiz orta qalyptastyrýǵa múmkindik beredi, — dedi ІІM tergeý departamentiniń bastyǵy Samat Aısov.
Aıta keteıik, buǵan deıin terrorızmge qarsy qorǵaý talaptaryn buzǵany úshin 263 basshy jaýapkershilikke tartylǵanyn jazdyq.
